काठमाडौँ । परराष्ट्रमन्त्री डा. आरजु राणा देउवाले हमासको नियन्त्रणमा रहेका नेपाली युवा विपिन जोशीको अवस्थाबारे यथार्थ जानकारी प्राप्त हुन नसकेको बताएकी छिन् । 

संयुक्त राष्ट्रसंघीय मानवअधिकार परिषद्को ५८ औँ उच्चस्तरीय सत्रमा भाग लिइ शुक्रबार स्वदेश फर्किएपछि त्रिभुवन बिमानस्थलमा सञ्चारकर्मीसंग कुरा गर्दै मन्त्री राणाले विपिन जोशीको यथार्थ जानकारी प्राप्त हुन नसकेपनि रिहाइका लागि भने पहल गरिरहेको बताएकी हुन् । हमासको कब्जामा नेपाली रहेको भए रिहाइका हुने आश्वासन अन्तराष्ट्रिय जगतबाट पाएको उनले बताइन् । 

त्रिभुवन बिमानस्थलमा सञ्चारकर्मीसँग विपिनको अवस्थाबारे प्रतिक्रिया दिदै उनले भनिन्, ‘विपिनको ठ्याक्कै अवस्था के हो भन्नुभएको छैन । पहल भएको भन्नेचाहीँ सबै जनालाई थाहा छ । र उहाँहरुले नोटिस पनि गर्नुभएको छ । यहाँ मात्रै होइन बेलायतमा भएका हाम्रो राजदूतलाई पनि बेबेला खबर गर्नुहुँदो रहेछ । तपाईँहरुको नेपालीलाई यदि त्यहाँ छन् भने रिहा गराउँछौ भन्नुभएको छ । राम्रो हुनेछ भन्ने आशा गरौँ ।’ 

त्यस्तै उनले उच्चस्तरीय सत्रमा नेपाललाई मानवअधिकार परिषदको सदस्यमा मत दिन आग्रह गरिएको जानकारी दिइन् । मानवअधिकारको रक्षा र प्रवर्धनमा नेपालको प्रतिवद्धताका बिषयमा जानकारी गराइएको उनले बताइन् ।

उनले जेनेभामा रहदा बिभिन्न देशका बिदेशमन्त्रीहरुसंग महत्वपूर्ण द्विपक्षीय भेटवार्ता भएको जानकारी दिइन् । मन्त्री डा देउवा ६ सदस्यीय नेपाली प्रतिनिधिमण्डलको नेतृत्व गर्दै गत शनिबार जेनेभा पुगेकी थिइन् ।