काठमाडौँ । गृहमन्त्री रमेश लेखकले सरकारले जारी गरेको अध्यादेश सदनले स्वीकार गर्ने दावी गरेका छन् । 

शुक्रबार काठमाडौँमा नेशनल प्याव्सनको ८ औं राष्ट्रिय महाधिवेशन उद्घाटन गर्दै मन्त्री लेखकले प्राविधिक र प्रक्रियात कारणले अध्यादेश प्रतिस्थापन गर्न ढिलाई भएको भन्दै समयभित्रै अध्यादेशलाई अघि बढाउने र सदनले स्वीकार गर्ने दावी गरेका हुन् ।

‘अब सदनमा पनि निश्चित समयावधिभित्र विधानको कामलाई सक्काउनैपर्ने व्यवस्था गरेर कानुन बनाउने विषयमा हाम्रो प्राथमिकता रहेको छ ।’, गृहमन्त्री लेखकले भने, ‘कांग्रेस, माओवादी, एमाले, रास्वपाले एकै कुरा भनिसकेपछि धेरै समस्या छ जस्तो मलाई लाग्दैन । विषयअनुरुप यो विधेयक पास हुन्छ ।’

उनले मुलुकमा सुशासन कायम गर्न र आर्थिक अवस्थालाई चलायमान बनाउन अध्यादेश ल्याएको बताए । अहिलेको समीकरण केही नेताहरुलाई प्रधानमन्त्री र मन्त्री बनाउनको लागि मात्रै नबनेको उनले बताए । उनले देशमा दिगो शान्ति, सुशासन र समृद्धिको यात्रा तय गर्न अहिलेको गठबन्धन बनेको उल्लेख गरे । गृहमन्त्री लेखकले शिक्षा विधेयकलाई समयमा नै पारित गरि शिक्षा क्षेत्रको कानूनी र नीतिगत सुधार गर्ने बताए ।

मन्त्री लेखकले संघीय संसदमा विधेयकलाई अघि बढाउन ढिलाई भएकाले निश्चित समयावधिभित्र विधायनका बिषयलाई टुङ्गाउने गरि काम गर्ने धारणा राखे । उनले नीजि वा आवासिय विद्यालयका कारण सार्वजनिक वा सामूदायिक विद्यालयको गुणस्तर नघटने जिकिर गर्नुभयो ।