गुठी पीडित किसान र प्रहरीबिच झडप, सिंहदरबारका डीएसपी घाइते

काठमाडौँ । काठमाडौँमा गुठी पीडित र प्रहरीबिच झडप हुँदा डीएसपी घाइते भएका छन् । आइतबार दिउँसो नयाँ बानेश्वरमा स्वर्गद्वारी गुठी पीडित मोही किसान संघर्ष समिति र प्रहरीबिच झडप हुँदा प्रदर्शनकारी र प्रहरी घाइते भएका हुन् । 

Watch On

झडप हुँदा प्रहरी वृत्त सिंहदरबारका डीएसपी गंगा पौडेल घाइते भएका छ्न् । उनको टाउकोमा चोट लागेको छ । फिल्डमा खटिएको क्रममा टाउको फुटेपछि उनलाई नजिकैको सिभिल अस्पतालको इमरजेन्सीमा लगेर उपचार गराइएको काठमाडौँ प्रहरी परिसरले जनाएको छ । त्यस्तै दोहोरो झडपमा केही प्रदर्शनकारी पनि घाइते भएका छन् ।

आफूहरुको मागप्रति सरकार अनुदार देखिएको भन्दै पछिल्लो समय गुठीका किसान काठमाडौँकेन्द्रित आन्दोलनमा छन् । आइतबार पनि आन्दोलनका लागि बानेश्वर पुगेका उनीहरुले निषेधित क्षेत्र तोड्न खोजेपछि प्रहरीले उनीहरुलाई रोकेको थियो । सोही क्रममा झडप भएको हो । 

सरकारले आफुहरुसँग गरेको सम्झौता कार्यान्वयन नगरेको भन्दै स्वर्गद्वारी गुठीपीडित मोही किसान संघर्ष समितिले काठमाडौँका विभिन्न स्थानमा विरोध प्रदर्शन गरिरहेको छ ।

२०८० चैत ७ गते भूमि व्यवस्था, सहकारी तथा गरिबी निवारण मन्त्रालय र स्वर्गद्वारी गुठी पीडित मोही किसान संघर्ष समितिबीच सहमति भएको थियो । सो सहमति अनुसार स्वर्गद्वारी आश्रमको जग्गामा बसोबास गर्ने संघर्षरत मोही किसानहरूको मागलाई सम्बोधन हुने गरी सरकारले नयाँ एकीकृत कानुन तर्जुमाको प्रक्रिया शुरू गर्ने उल्लेख गरिएको थियो ।

तर सरकारले सहमति कार्यान्वयन नगरेको भन्दै उनीहरुले काठमाडौँ केन्द्रीत आन्दोलन सुरु गरेका हुन् । स्वर्गद्वारी गुठीपीडित मोही किसानहरुले आफूहरुले मोही पूर्जा प्राप्त गरेपनि जमिन प्राप्त हुन नसकेको भन्दै आन्दोलनमा उत्रिनुपरेको बताउँदै आएका छन् । उनीहरु सरकारले आफुहरुसँग यसअघि गरेको सहमति कार्यान्वयन गर्नुपर्ने माग गरेका छन् ।