उत्तरी नाकाबाट आएका सामानको चोभार सुक्खा बन्दरगाहबाट भन्सार जाँचपास सुरु

काठमाडौँ । काठमाडौँको चोभरस्थित सुक्खा बन्दरगाहले उत्तरी नाकाबाट आएको सामानको पनि भन्सार जाँचपास सुरु गरेको छ । यसअघि दक्षिणी नाका वीरगञ्जबाट मात्रै कन्टेराइज्ड कार्गो र नयाँ सवारी साधनहरू भन्सार जाँच पासका लागि आउने गरेका थिए ।

Watch On

बिहीबारदेखि भने तातोपानी नाकाबाट पनि आउन थालेको हो । तातोपानी नाकाबाट भन्सार जाँचपासका लागि मालवाहक सवारी सवारीसाधन चोभार सुक्खा बन्दरगाहमा आउन थालेका इन्टरमोडल यातायात विकास समितिका कार्यकारी निर्देशक आशिष गजुरेलले बताए ।

२०७८ चैत्र २२ देखि सञ्चालनमा आएको चोभारमा सुक्खा बन्दरगाहमा फागुन १५ गते बिहीबार कोभेक–क्रिग–कालिका जोइन्ट भेन्चर कम्पनीले आयात गरेको सामग्री बोकेका सवारी पहिलोपटक आएका थिए । कम्पनीको हाइड्रोपावरको सामान बोकेका ४ वटा कन्टेनरहरू भन्सार जाँचपासका लागि सीधै चोभार आइपुगेको गजुरेलले बताए । 

अर्थ मन्त्रालयले २०८१ कार्तिकमा राजपत्रमा सूचना प्रकाशित गरी तातोपानी र रसुवा भन्सार कार्यालयबाट आन्तरिक परिवहन गरी चोभारस्थित सुक्खा बन्दरगाह भन्सार कार्यालयमा भन्सार जाँचपासका लागि सामान ल्याउन चाहने पैठारीकर्ताको लागि सडक मार्ग तोकेको थियो । 

यसअघि दक्षिणी नाकाहरू वीरगञ्ज, विराटनगर, काँकडभिट्टा र भैरहवा भन्सार कार्यालयबाट ल्याउन पाइने व्यवस्था थियो ।  तातोपानी नाकाबाट समेत मालवस्तु आउन थालेपछि चोभारमा थप चहलपहल बढ्न थालेको छ । 

उक्त सुक्खा बन्दरगाह पूर्ण क्षमतामा सञ्चालनमा ल्याउन थप टेवा पुग्ने नेपाल इन्टरमोडल यातायात विकास समितिका कार्यकारी निर्देशक आशीष गजुरेल बताउँछन् । पर्याप्त भौतिक पूर्वाधार, न्यूनतम सेवा शुल्कलगायत स्तरीय सेवा प्राप्त हुने भएकोले आगामी दिनमा आयात निर्यातकर्ताहरूले नियमित रूपमा मालवाहक सवारीसाधन चोभार आउने जानकारीसमेत दिए । त्यसैगरी आगामी दिनमा रसुवा नाकाबाट पनि सवारी साधन तथा कन्टेनर आउने वातावरण बनेको जनाइएको छ । 

काठमाडौँमा आयात हुने सामान र काठमाडौँ वरिपरिबाट निर्यात गर्न चोभारबाट स्तरीय सेवा दिइने हुँदा यस बन्दरगाहको अधिकतम प्रयोग गर्न व्यवसायीहरूलाई कार्यकारी निर्देशक आशीष गजुरेलले आग्रह गरे ।