प्रतिनिधिसभामा आज ५ अध्यादेश पेश हुँदै,कांग्रेस-एमालेका सांसदहरूलाई ह्विप

काठमाडौं । प्रतिनिधि सभाको आजको बैठकमा पाँच वटा अध्यादेश वीकृतिका लागि निर्णयार्थ पेस गरिने भएको छ । मंगलबार बसेको प्रतिनिधिसभाको कार्यव्यवस्था परामर्श समितिको बैठकले अध्यादेश स्वीकृतिका लागि निर्णयार्थ पेस गर्ने कार्यसूची तय गरेको हो । 

Watch On

यसअघि गत माघ २४ गते ६ वटै अध्यादेश कार्यसूचीमा चढेर पनि स्थगित भएको थियो । तर आज दिउँसो १ बजे बस्ने बैठकमा भने भूमिसम्बन्धी अध्यादेश पेश हुने छैन ।

सत्तापक्षमै रहेको जनता समाजवादी पार्टी(जसपा) नेपाल र लोकतान्त्रिक समाजवादी पार्टी (लोसपा) नेपालले भूमिसम्बन्धी अध्यादेश अगाडि बढाउन सहयोग नगर्ने जनाएपछि भूमिसम्बन्धी अध्यादेश रोकिएको हो । 

आजको बैठकमा २९ पुसमा जारी भएका  सुशासन प्रवद्र्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने अध्यादेश, आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, निजीकरण (पहिलो संशोधन) अध्यादेश र आर्थिक तथा व्यावसायिक वातावरण सुधार र लगानी अभिवृद्धिसम्बन्धी केही नेपाल ऐनलाई संशोधन गर्न बनेको अध्यादेश र गत १४ पुसमा जारी भएको सहकारी सम्बन्धी केही नेपाल ऐनलाई संशोधन गर्ने अध्यादेश निर्णयार्थ पेश हुने छन् । 

आज बस्ने प्रतिनिधि सभाको बैठकबाट पाँच वटा अध्यादेश स्वीकृत गराउने र प्रतिस्थापन विधेयक ल्याउने सरकारको तयारी छ । यसका लागि नेकपा एमाले र नेपाली कांग्रेसले आफ्ना सांसदहरूलाई अनिवार्य उपस्थित हुन ह्विप नै जारी गरेका छन् ।

आजको बैठकमा प्रतिस्थापन विधेयक ल्याउन अध्यादेश दुवै सदनबाट स्वीकृत गराउनुपर्छ । राष्ट्रिय सभाको बैठक भोलि बिहीबारलाई राखिएको छ । बिहीबार राष्ट्रिय सभाले पनि अध्यादेश स्वीकृत गरेको खण्डमा सरकारलाई विधेयक ल्याउने बाटो खुल्नेछ ।