सबै कुरा

पोखरामा कोटिहोम आयोजक र नगर प्रहरीबीच झडप, दर्जनबढी घाइते

सिधाकुरा

शुक्रबार, फागुन २३, २०८१

पोखरामा कोटिहोम आयोजक र नगर प्रहरीबीच झडप, दर्जनबढी घाइते

कास्की । पोखरामा कोटिहोम आयोजक पक्ष र नगर प्रहरीबीच झडप भएको छ । झडपमा दुबै पक्षबाट एक दर्जनबढी घाइते भएका छन् ।

Watch On

शुक्रबार बिहान बराहीघाटमा मानव सेवा फाउन्डेशनले भूमि पूजन गर्न लागेको थियो । कोटिहोम विराट ज्ञान महायज्ञ गर्नुअघि भूमि पूजन गर्न लागिएको बताएको फाउन्डेशनलाई महानगरले भने अनुमति नदिएको भन्दै रोक्न खोजेको थियो ।

नगरप्रहरीले भूमि पूजन रोक्न खोजेपछि नगर प्रहरी र कोटिहोम आयोजकबीच झडप भएको हो । वाराहीघाट क्षेत्रमा दुवै पक्षबीच झडप भएको र स्थिति नियन्त्रणमा लिने प्रयास भइरहेको जिल्ला प्रहरी कार्यालय, कास्कीले जनाएको छ।

कोटिहोम आयोजक संस्था मानव सेवा फाउन्डेशनका संस्थापक विजय कृष्णमूर्तिको अगुवाइमा आउँदो वैशाख १७ गतेदेखि जेठ २६ गतेसम्म पोखरामा कोटिहोम गर्ने तयारी छ। नेपाल पञ्चाङ्ग निर्णायक विकास समितिले कोटिहोमका लागि शुक्रबार भूमि पूजन गर्ने साईत दिएको थियो। त्यसैअनुसार, कोटिहोम आयोजक भूमि पूजन गर्न वाराहीघाट पुगेका थिए।

पर्यटकको आवागमन हुने ठाउँ भएकाले वाराहीघाटमा कोटिहोम महायज्ञ लगाउन नहुने महानगरले बताउँदै आएको छ। महानगरले कोटिहोमका लागि अनुमति नदिने जनाएको छ।

यसअघि कोटिहोमको तयारीका लागि भनेर पोखरा क्षेत्रका वरपीपलको रुख काटिएका थिए।