जनताको असन्तुष्टि राजातर्फ पोखियो, २ तिहाईको सरकारले जवाफ दिनुपर्छ: रवि लामिछाने

काठमाडौँ । राष्ट्रिय स्वतन्त्र पार्टीका सभापति रवि लामिछानेले राजाको समर्थनमा भइरहेको गतिविधिको जिम्मेवार वर्तमान सरकार रहेको आरोप लगाएका छन् । सोमबार बुटवलमा अदालतबाट बाहिरिने क्रममा सञ्चारकर्मीहरुको जिज्ञासामा लामिछानेले यस्तो बताएका हुन् । 

सरकार भ्रष्टचारलाई जोगाउने, अनुसन्धानका फाइल बन्द गर्ने कार्य गर्दा जनता असन्तुष्ट बनेको उनको भनाई छ । ‘हामी सरकारमा हुँदा माइतिघरमा समेत आन्दोलन नहुने अवस्था सिर्जना गरेका थियौँ । तर त्यसपछि भ्रष्टाचार विरुद्धका सबै अनुसन्धान रोकिए भन्ने सुन्छु । हामीले खोलेका फाइल बन्द गरे भन्ने सुन्छु । यी सबै गतिविधि जनताले हेरिरहेका छन् ।’, लामिछानेले भने, ‘हिजो उपस्थित भएका मानिसहरु जनताहरु नै हुन् । यो उहाँहरुको असन्तुष्टि हो । यसको जवाफ सत्ताले दिनुपर्छ ।’