१७ देशका लागि प्रस्तावित राजदूतहरुमध्ये चार जनाको सुनुवाई

काठमाडाैँ । संसदीय सुनुवाइ समितिले बिभिन्न देशका बिभिन्न १७ देशका लागि प्रस्तावित राजदूतहरुमध्ये बुधबार थप चार जनाको सुनुवाई गरेको छ ।

Watch On

सिंहदरबारमा बुधबार बसेको समिति बैठकले रुसी महासङ्घका लागि प्रस्तावित राजदूत जङ्गबहादुर चौहान, साउदी अरबका लागि प्रस्तावित राजदूत नरेश विक्रम ढकाल, दक्षिण अफ्रिकाका लागि प्रस्तावित राजदूत प्राडा कपिलमान श्रेष्ठ र दक्षिण कोरियाका लागि प्रस्तावित राजदूत शिवमाया तुम्वाहाङ्फेको संसदीय सुनुवाइ गरेको हो ।

सुनुवाईका क्रममा रुसी महासङ्घका लागि प्रस्तावित राजदूत जङ्गबहादुर चौहानले रुसी सेनामा रहेका नेपालीहरुको उद्दारका लागि सहजकर्ताको काम गर्ने, क्षतिपूर्तिका व्यवस्थाका लागि पहल गर्ने बताए । नेपालले आफ्नो असंलग्न परराष्ट्र नीतिलाई कायम राख्दै दुईपक्षीय हितका लागि विभिन्न क्षेत्रमा सहकार्य गर्नसक्ने उनको भनाइ छ । 

त्यस्तै साउदी अरबका लागि प्रस्तावित राजदूत नरेश विक्रम ढकालले दुइदेशबीच उच्चस्तरको भ्रमणका लागि पहल गर्ने, श्रम बजारलाई व्यवस्थीत गर्ने लगायतका कार्ययोजना प्रस्तुत गरे । उनले साउदी अरबमा रहेका नेपालीहरुका लागि आवश्यक सहजीकरण गर्ने, नयाँ श्रम सम्झौता गर्ने कामलाई महत्वका साथ लिएको धारणा राखे । 

त्यस्तै दक्षिण अफ्रिकाका लागि प्रस्तावित राजदूत प्राडा कपिलमान श्रेष्ठले दुई देशबीचको सम्बन्धलाई विस्तार गर्दै नेपालको बिभिन्न क्षेत्रमा लगानी प्रवर्धनका लागि भूमिका खेल्ने बताए । 

त्यस्तै दक्षिण कोरियाका लागि प्रस्तावित राजदूत शिवमाया तुम्वाहाङ्फेले ईपीएस प्रणालीमार्फत कामदारको कोटा बृद्दिका लागि पहल गर्ने बताए । सरकारले साउन १४ गते बिभिन्न १७ देशका लागि राजदूत सिफरिस गरेको थियो । सिफारिस भएका राजदूतहरुको समितिले निरन्तर सुनुवाई गरिरहेको छ ।