सबै कुरा

अवैध हतियार सहित भारतीय नागरिक पक्राउ

प्रिमेश शिवाकोटी

सोमबार, माघ ७, २०८१

रौतहट । सशस्त्र प्रहरीले अबैध हतियार सहित भारतीय नागरिक पक्राउ गरेको छ । रौतहटमा शनिवार राती अवैध कटुवा पेस्तोल सहित भारत बिहार जिल्ला पूर्वी चम्पारण मोतिहारी वसन्तपुर ग्राम पञ्चायत ९ बस्ने २६ वर्षीय धनञ्जय कुमार झालाई पक्राउ गरेको सशस्त्र प्रहरी बल नम्बर ११ गण हेक्वाटर रौतहटका सशस्त्र प्रहरी उपरीक्षक विक्रम हुमागाईँले जानकारी दिए ।

पक्राउ परेका झाको साथबाट सेमी अटोमेटिक पेस्तोल १ नाल, सोको म्यागेजिन १ वटा र ७।६५ एम एमको ४ राउण्ड गोली बरामद भएको उपरीक्षक हुमागाईले जानकारी दिए ।

भारतीय सीमानाका सँग जोडिएको ईशनाथ नगरपालिका ४ लतमरी नाका नजिकै रहेको सुनिल होटलमा खाजा खाइरहेका अबस्थामा सशस्त्र प्रहरीले जाँच गर्दा उनी पक्राउ परेका हुन । खाजा खाइरहेका उनीसहित शङ्कास्पद ३ जना व्यक्तिहरूलाई चेकजाँच गर्ने क्रममा २ जना व्यक्तिहरू तत्कालै फरार भएको र झालाई भने पक्राउ गरिएको सशस्त्र प्रहरीले जनाएको छ ।

सशस्त्र प्रहरी बल नेपाल मठियाबाट खटिएको टोलीले झालाई पक्राउ गर्नुको साथै उनले प्रयोग गरेको बीआर ०५ बी डी १२२४ नम्बरको अपाचे मोटरसाइकल १ थान र सामसङ कम्पनीको ए ३५ मोबाइल १ थान समेत बरामद गरिएको उपरीक्षक विक्रम हुमागाईँले जानकारी दिए ।

प्रकाशित मिति: सोमबार, माघ ७, २०८१

प्रतिक्रिया दिनुहोस्