बाँकेको जयेन्दु बालसुधार गृहमा दुई समुहबीच झडप, ६ जना घाइते

बाँके । बाँकेको डुडुवामा रहेको जयेन्दु बाल सुधार गृहमा झडप भएको छ । बालबन्दीबीचको झडपमा ६ जना घाइते भएको बाँकेका प्रहरी प्रवक्ता डीएसपी दिपक पातलीले जानकारी दिए । घाइते ६ जनालाई उपचारका लागि नर्सिङहोम नेपालगञ्ज ल्याइएको छ ।  
 
प्रवक्ता पातलीका अनुसार, बाल सुधार गृहमा राति ११ बजेतिर झडप भएको खबर आएको थियो । त्यसपछि ठूलो संख्यामा प्रहरी घटनास्थलमा पुग्यो । प्रहरीले राती डेढ बजेतिर घाइतेको उद्दार गरेको थियो ।  

Watch On

‘प्रहरीलाई भित्र जान दिइएको छैन । सम्झाएर भित्र जाने प्रयास भइरहेको छ । कति भागे भन्ने यकिन हुन सकेको छैन । दुई जना भागेको बाहिर खबर आएको छ ।’, प्रवक्ता पातलीले सिधाकुरासँग भने ।
सो बाल सुधार गृहमा अढाइ सय बालबन्दी रहेका छन् । यहाँ पटक–पटक झडप हुने गर्दछ । केही दिन अघिमात्रै सोही सुधार गृहमा तीन जना प्रहरी कुटिएका थिए । 

यसअघि झडप गर्नेहरूलाई प्रहरीले नौबस्ता सुधार गृहमा स्थानान्तरण गरेको थियो । त्यहाँ पनि पटक–पटक झडप हुने गरेको छ । त्यहाँबाट समेत केही भागेका थिए, अझै फेला परेका छैनन् । 

बाल सुधार गृह सुरक्षा चुनौती बनिरहेको छ । प्रहरीले बल प्रयोग गर्दैन । भित्र रहेकाहरु आपसमा लडिरहन्छन् । १८ वर्ष नपुगेलाई राख्न बनाइएको बाल सुधार गृहमा २८–२९ वर्षकासम्म बसाउँदा सधै लफडा हुने गरेको जानकारहरू बताउँछन् ।