बन्धक प्रस्तावपछि हमासले भन्यो– ‘बल इजरायलको कोर्टमा छ’

गाजा युद्धविराम वार्ताको एक हिस्साका रूपमा इजरायली–अमेरिकी बन्धकलाई रिहा गर्ने र अन्य चार जनाको शव फिर्ता गर्ने प्रस्ताव गरेपछि हमासले शनिबार ‘बल इजरायलको कोर्टमा छ’ भनेको छ ।

Watch On

शुक्रबारको प्रस्तावपछि इजरायलले अमेरिकी राष्ट्रपति डोनाल्ड ट्रम्पका मध्यपूर्वका दूतको प्रस्तावपछि प्यालेस्टिनी लडाकूहरू ‘एक मिलिमिटर पनि विचलित नभएको’ बताएको छ ।जनवरीमा शुरू भएको युद्धविरामको पहिलो चरण मार्च १ मा अर्को चरणको बारेमा सहमति नभई समाप्त भयो । हमासका एक अधिकारीले वार्ता मङ्गलबार दोहामा शुरू भएको बताए ।

“बल इजरायलको कोर्टमा छ”, हमासका प्रवक्ता अब्दुल लतिफ अल–कानोउले इजरायललाई यसको कार्यान्वयनमा ‘ढिलाइ’ गरेको आरोप लगाउँदै भने, “हामी युद्धविराम सम्झौतालाई बलियो बनाउन चाहन्छौँ र (इजरायल) लाई यसका सर्तहरू कार्यान्वयन गर्न बाध्य पार्न चाहन्छौँ ।”

उनले मार्च २ देखि गाजामा मानवीय सहायता प्रवेशमा भइरहेको अवरोधलाई औँल्याए । हमासको राजनीतिक ब्युरोका एक सदस्यले अज्ञात रूपमा बोल्दै एएफपीलाई हमासको सन् २०२३ अक्टोबर ७ को आक्रमणका क्रममा अपहरण गरिएका २१ वर्षीय सैनिक एडन अलेक्जान्डरलाई रिहा गर्ने र अन्य चार इजरायली–अमेरिकी बन्धकहरूको शव फिर्ता गर्ने प्रस्ताव ‘अद्वितीय सम्झौता’ को हिस्सा भएको बताए ।

अधिकारीका अनुसार बदलामा इजरायलले प्यालेस्टिनी कैदीहरूलाई मुक्त गर्नेछ र यसको सङ्ख्या अझै वार्तामा रहेको छ । अधिकारीका अनुसार वार्ता ५० दिनको अवधिभित्र समाप्त हुने गरी प्रस्तावित आदान–प्रदान युद्धविरामको दोस्रो चरणको कार्यान्वयनका लागि एकै समयमा वार्ता शुरू गर्ने सर्त गरिएको थियो ।

प्रस्तावले गाजामा मानवीय सहायता प्रवेशका लागि सबै सीमा क्रसिङहरू तुरुन्तै खोल्न र फिलाडेल्फिया करिडोरबाट इजरायली सेना फिर्ता लिने आह्वान पनि गरेको उनले बताए । इजरायली प्रधानमन्त्री बेन्जामिन नेतन्याहुको कार्यालयले शुक्रबार हमासलाई ‘हेरेफेर र मनोवैज्ञानिक युद्धमा’ भर परेको आरोप लगाएको थियो ।
नेतान्याहुको कार्यालयले ‘वार्ता टोलीबाट विस्तृत प्रतिवेदन प्राप्त गर्न र बन्धकहरूलाई मुक्त गर्ने दिशामा अर्को कदमहरू निर्णय गर्न’ प्रधानमन्त्री नेतन्याहुले शनिबार अबेर धेरै मन्त्रीहरूसँग भेट्नुहुने बताएको छ ।

ह्वाइट हाउसले शुक्रबार हमासलाई ‘पूर्ण रूपमा अव्यावहारिक’ मागहरू गरेको र ‘समय आफ्नो पक्षमा छ भनेर धेरै खराब शर्त लगाएको’ आरोप लगाएको छ ।
जनवरी १९ मा लागु भएको युद्धविरामको प्रारम्भिक छ हप्ताको चरणमा लडाकूहरूले इजरायली जेलमा रहेका लगभग एक हजार आठ सय प्यालेस्टिनी बन्दीहरूको सट्टामा आठजना मृतकसहित ३३ जना बन्धकलाई रिहा गरेका छन् ।
गाजामा अझै ५८ बन्धक छन् । तीमध्ये ३४ जनालाई इजरायली सेनाले मृत घोषित गरेको छ ।