कांग्रेस र एमालेको एउटै स्वरः सरकार परिवर्तन हुँदैन, सरकारमा आउन रुची राख्नेले अनावश्यक हल्ला फैलाए

काठमाडौँ । नेपाली काँग्रेसका प्रमुख सचेतक श्याम घिमिरेले अहिलेको गठबन्धन तोडेर नयाँ सरकार गठन गर्ने बिषयमा कुनै छलफल नभएको बताएका छन् । सोमबार संसद भवनमा सञ्चारकर्मीसंग कुरा गर्दै घिमिरेले मुलुकको स्थायीत्वका लागि वर्तमान सरकार गठन भएको भन्दै यसलाई तोडेर नयाँ सरकार गठन गर्ने बिषयमा कुनै छलफल नभएको बताएका हुन् ।

Watch On

उनले नयाँ सरकार गठन हुने भन्ने भ्रममा नपर्न आग्रह समेत गरे । घिमिरेले भूमिसम्बन्धी अध्यादेश अब अध्यादेशको रुपमा आउने सम्भावना समाप्त भएको उल्लेख गरे । उनले भूमिसम्बन्धी अध्यादेशलाई परिमार्जित गरेर सबैलाई स्वीकार हुनेगरी कानुनकै रुपमा अगाडि बढाउने उल्लेख गरे । 

त्यस्तै नेकपा एमालेका प्रमुख सचेतक महेश बर्तौलाले पनि सरकार परिवर्तन हुने कुनै सम्भावना नरहेको बताए । बर्तौलाले ठूला दुई दलका साथै अन्य केही दल मिलेर बनेको वर्तमान सरकार नै राष्ट्रिय सहमतिको आधारमा बनेको सरकार भएकाले सरकार परिवर्तन हुने कुनै सम्भावना नरहेको बताएका हुन् । 

उनले सरकार परिवर्तन वा कुनै दललाई सरकारमा भित्राउने वा बाहिर पठाउने भन्ने बिषयमा समेत कुनै बैठक नभएको धारणा राखे । सरकारमा आउन रुची भएकाहरुले सरकार परिवर्तनको हल्ला चलाएको उनको भनाई छ । उनले अहिलेको सरकार सहझ ढंगले अघि बढिरहेको र यहि सरकारले निरन्तरता पाउने जिकिर गरे ।

उनले अहिले कांग्रेस र एमालेको संयुक्त सरकार भएपनि ८४ को निर्वाचनमा एमालेले बहुमत ल्याउने गरि तयारी गर्ने बताए ।