महायज्ञ गर्न दलितको घर भत्काएको प्रकरणः गाउँपालिका अध्यक्ष र पूर्व वडाध्यक्ष पक्राउ

काठमाडौँ । सिरहामा महायज्ञ गर्न दलित परिवारको घर भत्काएको विषयमा २ जना पक्राउ परेका छन् । जिल्ला प्रहरी कार्यालय सिरहाले औरही गाउँपालिकाका अध्यक्ष शिवजी यादव र औरही–५ का पूर्व वडाध्यक्ष दिलीप यादवलाई पक्राउ गरेको हो । 

Watch On

उनीहरु दुवैजनालाई पक्राउ गरेर सिरहा प्रहरीमा राखिएको मधेश प्रदेशका प्रहरी प्रमुख लालमणि आचार्यले जानकारी दिए । उनका अनुसार उनीहरु दुवैजनालाई शुक्रबार साँझ पक्राउ गरिएको हो । 

सिरहाको औरही ५ मा महायज्ञ लगाउने नाममा एक दलित परिवारको उठिबास बनाएर महायज्ञस्थल बनाइएको थियो । औरहीस्थित हुलाकी सडक छेउमा चैत १७ गते देखि विष्णु महायज्ञ लगाउने भन्दै बजरङ्गी बाबाको निर्देशनमा गाउँपालिका अध्यक्ष शिवजी यादवले दीपक मलिक डोमको घरनै भत्काइदिएका थिए ।

महायज्ञ स्थलमा दलित वरिपरि हिँडडुल समेत गर्न नहुने भन्दै दलितको घर भत्काएर, घर भएको जग्गाको माटो समेत फालिएको थियो । यो ठाउँमा पहिले स्थानीय दीपक डोमको परिवार ३० वर्षदेखि बस्दै आएका थिए । सरकारले जनता आवास कार्यक्रम मार्फत ५ वर्ष अघि मात्रै उनीहरूका लागि २ कोठे पक्की घर बनाइदिएको थियो । तर बजरङ्गी बाबालाई यही ठाउँमा विष्णु महायज्ञ लगाउन मन लागेपछि दिपकको परिवारको उठिबास लागेको छ । तर सो स्थानमा भएका अन्य व्यक्ति तथा समुदायका घर भने भत्काइएको छैन । 

बजरङ्गी बाबाको निर्देशन अनुसार फागुन १० गते गाउँपालिका अध्यक्ष शिवजी यादवले डोजर पठाएर उनीहरूको घर भत्काइदिएका हुन् । यसका लागि पूर्व वडाध्यक्ष दिलीप यादवले समन्वय गरेका थिए ।