निमुखा चेपाङको बस्तीमा बत्ती बाल्दै थिए कुलमान, उनलाई हटाउने निर्णयमा हस्ताक्षर गर्दै थियो सरकार 

मकवानपुर । सोमबार साँझ बसेको मन्त्रिपरिषद्को बैठकले नेपाल विद्युत प्राधिकरणको कार्यकारी निर्देशक पदबाट कुलमान घिसिङलाई हटाउने निर्णय गर्यो । यसका लागि उर्जामन्त्री दीपक खड्काले मन्त्रिपरिषद्मा प्रस्ताव लगेका थिए । 

Watch On

यता सरकारले प्राधिकरणबाट कुलमानलाई हटाउने निर्णय गर्दैगर्दा कुलमान भने मकवानपुर पुगेर विपन्न चेपाङहरूको घर झिलिमिली पार्दै थिए । 

सोमबार उनले मकवानपुरको राक्सिराङ गाउँपालिका ९ खैराङस्थित चेपाङबस्तीसहित सिंगो पालिकालाई पूर्ण विद्युतीकरण भएको घोषणा गरे । सोमबार बिहान ७ः३० बजेको फ्लाइटमा चितवन पुगेका कुलमान त्यहाँबाट गाडीमा खैराङ पुगेका थिए ।

स्थानीयले बाजागाजासहित उनको स्वागत गरे । कार्यक्रम सकेर कुलमान पुनः भरतपुर हुँदै साँझ ५ बजेको फ्लाइटमा काठमाडौं फर्किएका थिए । साँझ ६ बजे कार्यालय आइपुगेका उनी राति ८ बजेसम्म मन्त्रिपरिषद्को निर्णय सार्वजनिक हुनेबेलासम्म कार्यालयमै थिए । 

आफूलाई औपचारिकरुपमा कुनै जानकारी नआएपनि संचार माध्यत तथा अनौपचारिक तवरबाट निर्णय भएको जानकारी पाएको कुलमान बताउँछन् । निर्णयपत्र प्राप्त भएपछि कानुनी उपचारमा जाने उनको तयारी रहेको छ । 

मकवानपुरको राक्सिराङ गाउँपालिका– ९ खैराङस्थित चेपाङ बस्तीमा सोमबार ७० वर्षीया तुलकुमारी चेपाङको घरको विद्युत् मिटर ‘अन’ गरेर बत्ती बाल्दै कुलमान । तस्बिर:अञ्जली थापाररासस