राजसंस्था पुनर्स्थापनाका लागि गरिने आन्दोलनको कमान्डर दुर्गा प्रसाईँ

काठमाडौँ । राजावादीहरुले राजसंस्था पुनर्स्थापनाकाका लागि गठित संयुक्त जनआन्दोलनको कमान्डर दुर्गा प्रसाईंलाई बनाएका छन् । 

Watch On

राजसंस्था पुनर्स्थापनाका लागि गठित संयुक्त जनआन्दोलन समितिका संयोजक नवराज सुवेदीले काठमाडौँमा पत्रकार सम्मेलन गर्दै प्रसाईंलाई कमाण्डर बनाइएको जानकारी दिएका हुन् । 

१५ गते अर्थात भोलि राजावादीहरुले काठमाडौँको तिनकुनेमा प्रदर्शन गर्दैछन् । यसकोे नेतृत्व पनि प्रसाईँले नै गर्दैैछन् । भोलि नै समाजवादी मोर्चाले पनि काठमाडौँमा आन्दोलन गर्दै छन् ।

समाजवादी मोर्चाले भृकुटीमण्डपमा आन्दोलन गर्ने जनाएका छन् । 

राजसंस्था पुनस्र्थापनाका लागि संयुक्त जनआन्दोलन समितिले संवैधानिक राजसंस्थाको पुनस्र्थापनाका लागि निरन्तर आन्दोलन गर्ने जनाएको छ ।

समितिले संवैधानिक राजसंस्थाको पुनस्र्थापना, सनातन हिन्दू अधिराज्यको पुनस्र्थापना, संघीयता खारेजी र भ्रष्टाचार नियन्त्रण र सुशासनका लागि निरन्तर आन्दोलन गर्ने जनाएको हो । 

चैत्र १५ गते काठमाडौंमा प्रदर्शन गरेपछि चैत्र १७ गतदेखि आन्दोलनका थप कार्यक्रमलाई अघि बढाइने संयुक्त जनआन्दोलन समितिका संयोजक नवराज सुवेदीले जानकारी दिए । 

उनले २०४७ को संविधानलाई आधार मानेर ७२ को संविधानका सकारात्मक प्रावधानलाई समेट्दै प्रमुख राजनीतिक पक्षहरूबीच सहमतिको बाटो बनोस भन्ने चाहना रहेको जिकिर गरे । यसबाट संविधान र व्यवस्था दुवैमा संरचनागत पुनरावलोकन गर्न सकिने उनको भनाइ छ । संयोजक सुवेदीले हिजो गणतन्त्र खोजेका जनताले अहिले पुन राजसंस्था खोजेको उल्लेख गर्दै राजनीतिभन्दा माथिको अभिभावकीय भूमिकामा संवैधानिक राजसंस्था आवश्यक रहेको धारणा राखे । 

सुवेदीले पछिल्लो चरणमा धेरै पक्षबाट सवैलाई एकतावद्ध गरेर अघि बढ्न आफुलाई आग्रह भएपछि ८७ बर्षको उमेरमा पनि सवैलाई संयोजन गर्ने जिम्मेवारी बहन गर्ने निर्णय लिएको बताए ।