फरार भएका दुर्गा प्रसाईँको भिडियो बयानः म भागेको छैन, काठमाडौँमै छु (भिडियोसहित)

काठमाडौँ । तीनकुने घटनापछि फरार भएका दुर्गा प्रसाईँले आफू फरार नभएको बताएका छन् । दुर्गा प्रसाईँ नामक फेसबुक पेजमा पोस्ट भएको भिडियोमा प्रसाई कुनै मन्दिरका अघि बसेका छन् ।

Watch On

तीनकुने घटनामा आफूलाई गोली हान्ने अवस्था देखेपछि आफू सुरक्षीत रहनका लागि काठमाडौँकै कुनै एक मन्दिरमा बसेको उल्लेख गरेका छन् । 

उनले भनेका छन्,'शान्तिपूर्वक जनविद्रोह कार्यक्रम घोषण गर्न जाँदै गर्दा मलाई मार्ने योजना रहेछ' ।

प्रसाईले युवा संघ र प्रहरीले कार्यक्रम सुरु हुनुपुर्व नै घुसपैठ गरेको आरोप लगाएका छन् । उनले आफूलाई गन्जालोमा हालेर आन्दोलन दबाउन खोजेको दाबी समेत गरेका छन् । 
प्रसाईको भनाइ यस्तो छ

''चैत १५ गते बिहानैदेखि विभिन्न भेषभुषामा युवा संघका केही व्यक्ति, पुलिस प्रशासनका केही व्यक्ति सिभिल डेसमा हतियारसहित अर्काको घरमा चढेर बसेका रहेछन् । हामी डेढ बजे कार्यक्रमस्थल पुग्नुभन्दा १५ मिनेट अगाडिदेखि नै स्टेज पुग्न नदिइकन बाटोबाट गोली र टियरग्याँस हान्न थाले । मलाई गोली हान्न छतमा सार्प सुटर बसेर टार्गेट गरेका थिए । स्टेज छेउमा पुग्दा मेरो कानको छेउबाटै गोली गयो । अर्को कुरा मेरै गाडीमा टियरग्याँस खसेपछि मलाई मार्नेरहेछन् भन्ने बुझेर अरु उपाय नभएपछि ब्यारिकेड तोडेर अगाडि गएको हुँ ।

माओवादीको सभामा ३ हजार मान्छे आए, हाम्रा मान्छे बढी हुन्छन् भनेर कलंकी, गौशाला, बसपार्कको मास आउन दिएनन् । जुलुस बाटोबाटोमा रोकेर १५ मिनेट अगाडिदेखि रणभूमि बनाए । म सुरक्षित हुन सुरक्षाकर्मीको घेरा तोडेर भित्र पसेको हो । प्रहरीप्रति दुश्मनी होइन । पर्न गएको चोटमा क्षमा चाहन्छु ।

दुर्गा प्रसाईं टाढा छैन । १२ भाइ मिडिया हात धोएर लाग्या छन् । म भागेको छैन, भाग्दिनँ । पुलिस र प्रशासनले मलाई खोज्नुपर्दैन । मलाई गोञ्जालो बनाएर दबाउन खोजिएको छ । त्यसैले सुरक्षितमात्रै बसेको हो । प्रधानमन्त्रीबाटै गोली हान्ने आदेश छ भन्ने सुनेपछि सुरक्षित बसेको हुँ । म भाग्दिनँ । बरु तपाईंहरुकै अगाडि मर्छु ''।