रवि लामिछानेलाई भैरहवा पुर्याइयो

रुपन्देही ।राष्ट्रिय स्वतन्त्र पार्टी रास्वपाका सभापति रवि लामिछानेलाई भैरहवा पुर्याइएको छ । शनिबार बिहान यति एअरलाइन्सको विमानमार्फत लामिछानेलाई भैरहवा पुर्याइएको हो । 

Watch On

शुक्रबार उच्च अदालत तुलसीपुरको बुटवल इजलासले सहकारीको रकम ठगेको कसुरमा पुर्पक्षका लागि थुनामा पठाउन आदेश गरेको थियो ।
उच्च अदालत तुलसीपुरको बुटवल इजलासका न्यायाधीशद्वय रमेश ढकाल र स्वीकृति पराजुलीको इजलासले लामिछानेलाई थुनामा पठाउने आदेश गरेको हो । 
सो आदेश आएको केही बेरमै पक्राउ परेका लामिछानेलाई थुनामा राख्न भैरहवा पुर्याइएको हो । उनलाई जिल्ला प्रहरी कार्यालय रुपन्देहीमा राखिने बताइएको छ । 
यसअघि लामिछानेलाई जिल्ला अदालत रुपन्देहीले सोही प्रकरणमा एक करोड धरौटीमा रिहा गर्न आदेश दिएको थियो । सो आदेशविरुद्ध जिल्ला सरकारी वकिलको कार्यालय उच्च अदालत गएको थियो भने लामिछाने पनि धरौटी बदरको माग गर्दै उच्च अदालत पुगेका थिए । 
सोही पुनरावेदनविरुद्ध अदालतले उनलाई थुनामा पठाउने आदेश दिएको हो । आदेश आएको एक घण्टा पनि नबित्दै प्रहरीले उनको बुढानिलण्ठस्थित निवास घेरेर उनलाई पक्राउ गरेको थियो । 

पक्राउ पर्नुअघि उनले सामाजिक सञ्जालमार्फत छोटो सन्देश दिदै आफूमाथि ठूलो अन्याय भएको बताएका छन् । उनले बाँकी न्यायलयका ढोकाहरु खुल्लै हुने आशा व्यक्त गरेका छन् । र उनले शनिबारका लागि चितवनमा तय भएको कार्यक्रम नरोक्न पनि भनेका छन् ।