ईलाका प्रशासन कार्यालय कटारीले गर्यो आफ्नै भवनबाट सेवा सुरु

उदयपुर । करिब १२ वर्षदेखि भाडाको भवनमा सञ्चालन हुँदै आएको ईलाका प्रशासन कार्यालय कटारीले सोमबारदेखि आफ्नै नवनिर्मित भवनबाट सेवा सञ्चालन सुरु गरेको छ।

कटारी नगरपालिका–३ स्थित नयाँ भवनबाट कार्यालयले औपचारिक रूपमा सेवा दिन सुरु गरेको हो। संघीय सरकारको गृह मन्त्रालय अन्तर्गत ५ करोड ६३ लाख २० हजार ९८१ रुपैयाँ ७६ पैसाको लागतमा निर्माण सम्पन्न भएको सो भवनबाट आजबाट सेवा सुचारु गरिएको हो।

उदयपुर जिल्लाकै दोस्रो ठूलो व्यापारिक केन्द्र कटारी बजारमा अवस्थित उक्त कार्यालयबाट जिल्लाको पश्चिमी भेगका सेवाग्राहीहरूलाई प्रशासनिक सेवा दिइँदै आएको ईलाका प्रशासन कार्यालय प्रमुख कोपिला राईले बताइन्।

भवन निर्माणको जिम्मा वानेश्वर-१० स्थित मिसन कन्स्ट्रक्सन एण्ड सप्लायर्स प्रालिले लिएको थियो। २०७९ साल असारमा तत्कालीन प्रमुख जिल्ला अधिकारी बिरेन्द्रकुमार यादवले शिलान्यास गरेका थिए। सम्झौता अनुसार दुई वर्षभित्र निर्माण सक्नुपर्ने गरी काम थालिएको थियो।

भवन निर्माण सम्पन्न भइसकेकाले आफ्नै भवन बाट आज देखि सेवा सुरु गरिएको प्रमुख जिल्ला अधिकारी  प्रेम लुइँटेलले बताए । हाल ईलाका प्रशासन कार्यालयले कटारी नगरपालिका, ताप्ली गाउँपालिका र उदयपुरगढी गाउँपालिकाको वडा नम्बर १, २ र ३ का सेवाग्राहीलाई सेवा प्रदान गर्दै  आएको छ।