पक्राउ परेका नेता कार्यकर्तालाई रिहा र पक्राउ पुर्जी खारेज नगरे सामूहिक गिरफ्तारी दिने जगमान गुरुङको चेतावनी

काठमाडौँ । राजसंस्था पुर्नस्थापनाका लागि गठन भएको जनआन्दोलन समितिका कार्यवहाक संयोजक डा जगमान गुरुङले चैत १५ गते पक्राउ परेकालाई रिहा एवं नवराज सुवेदीको नजरबन्द नहटाए सामूहिक गिरफ्तारी दिने चेतावनी दिएका छन् । 

बुधबार काठमाडौँमा आयोजित कार्यक्रममार्फत गुरुङले सरकारले आफूहरुका नेता कायकर्तालाई निशर्त रिहा नगरे बैशाख २२ गते सामूहिक गिरफ्तारी दिने घोषणा गरेका हुन् । 

गुरुङले सरकारले राजसंस्था पक्षधरको मनोबल गिराउन चैत १५ गतेको कार्यक्रमपछि जारी भएका पक्राउ पुर्जी खारेज गर्नुपर्ने र नवराज सुवेदीको नजरबन्द हटाउनुपर्ने माग राखेका छन् । 

‘वैशाख २२ गतेसम्म पनि यो सरकारले हाम्रा साथीहरुको वारेन्ट बर्खास्त गरेन भने, हाम्रा संयोजकको नजरबन्द हटाएन भने र बन्दी बनाइएका साथीहरुलाई मुक्त बनाइएन भने २२ गते हामी सामूहिक गिरफतारी दिन्छौँ,’ गुरुङले भने । 

सामूहिक गिरफ्तारीको अगुवाई आफुले गर्ने उनले बताए । 

गुरुङले अव आफुहरुको आन्दोलन भ्रद्र प्रकारको हुने बताए । अहिले सशस्त्र आन्दोलनको आवश्यकता नरहेको उनको भनाइ छ । गुरुङले राजावादीको आन्दोलन कमजोर भएको हल्ला फैलाइएको भन्दै अहिले आफुहरु योजनामा व्यस्त रहेको उल्लेख गरे । उनले वैशाख २१ देखि एक्सनमा जाने जिकिर गरे ।

त्यस्तै राप्रपा नेपालका अध्यक्ष कमल थापाले चैत्र १५ गते तीनकुनेमा आयोजना गरिएको सभालाई राज्यले हिंसात्मक बनाएको आरोप लगाए । राजावादीहरुलाई कमजोर र बद्नाम गराउन राज्यले उक्त घटनामा पूर्वराजा ज्ञानेन्द्र शाहमाथि आरोप थुपार्ने काम गरेको उनले बताए । 
उनले संघीय धर्म निरपेक्ष गणतन्त्रलाई परिवर्तन गर्न नपाउने गरि संविधान संशोधनको प्रयास भएको भन्दै त्यसो गरिए देशमा आगो बल्ने चेतावनी दिए ।