समाज

तीनकुने घटनाबारे गृहमन्त्रीकाे प्रश्न, 'मान्छेका घर बालेर, जिउँदै मान्छे घरभित्र पोलेर पुण्य भयो ?'

सिधाकुरा

शुक्रबार, चैत २९, २०८१

तीनकुने घटनाबारे गृहमन्त्रीकाे प्रश्न, 'मान्छेका घर बालेर, जिउँदै मान्छे घरभित्र पोलेर पुण्य भयो ?'

काठमाडौँ । गृहमन्त्री रमेश लेखकले तीनकुने घटनामाथि प्रश्न उठाएका छन् । शुक्रबार कानून समितिको बैठकमा उक्त घटनाबारे जानकारी गराउँदै गृहमन्त्री लेखकले जिउँदै मान्छे घरभित्र पोलेर पुण्य नहुने बताएका हुन् ।

बैठकमा १८ पुराणको शार सुनाउँदै उनले अरुलाई दुखः दिएर र पीडा दिएर हिन्दु धर्म नजोड्न आग्रह गरे । उनले आफू हिन्दु धर्मप्रति विश्वास भएको व्यक्ति भएको तर पछिल्लो समय हिन्दु धर्मलाई जोडेर अधार्मिक काम भइरहेको बताए ।

‘म व्यक्तिगतरूपमा पनि हिन्दू धर्मप्रति विश्वास भएको मान्छे हुँ । हिन्दू धर्म संसारको उत्कृष्ट दर्शनमा आधारित धर्म हो । त्यसमा द्वविधा छैन । तर, हिन्दू धर्मजस्तो संसारको उत्कृष्ट धर्मलाई निकृष्ट राजनीतिको रुपमा प्रयोग नगरौं ।’, गृहमन्त्री लेखकले भने, ‘मान्छेका सम्पत्तिमा आगो लगाएर पुण्य भयो ? जिउँदै घरभित्र मान्छे पोलेर पुण्य भयो ? अनि के चाहियो भन्दा हिन्दू राष्ट्र रे ! त्यसैले यसरी दुरुपयोग नगरौँ ।’

त्यस्तै उनले तीनकुनेमा गरेको हिंसात्मक प्रदर्शनलाई संविधान च्यात्ने र व्यवस्था मास्ने प्रयासको रुपमा चित्रण गरेका छन् । लोकतन्त्रमा व्यवस्थाविरुद्ध पनि छलफल र बहस गर्न पाउने भएकाले उनले लोकतन्त्रजस्तो अर्को उत्तम व्यवस्था नभएको समेत बताए ।

प्रकाशित मिति: शुक्रबार, चैत २९, २०८१

प्रतिक्रिया दिनुहोस्