वीरगंजमा आइतबार राति १२ बजेसम्मको लागि लम्बियो कर्फ्यु

वीरगंज । जिल्ला प्रशासन कार्यालय पर्साले वीरगञ्जको छपकैयामा लगाएको कर्फ्यु लम्बाएको छ । शनिबार साँझ ७ः३० बजेदेखि आइतबार दिनको १२ बजेसम्मका लागि लगाएको कर्फ्यु १२ घण्टा लम्बाएर राति १२ बजेसम्म पुर्याएको हो ।

Watch On

शनिबार वीरगंजमा हनुमान जयन्तीको अवसरमा निकालिएको शोभायात्राको क्रममा झडप हुँदा अवस्था असामान्य बनेको थियो । स्थिति नियन्त्रणबाहिर गएपछि जिल्ला प्रशासन कार्यालयले कर्फ्यु लगाएको थियो । प्रशासनले कर्फ्यु लगाउँदा समेत अवस्था सामान्य नभएको भन्दै प्रशासनले कर्फ्यु लम्बाएको हो । 

वीरगञ्जको पूर्वमा बाइपास रोड, पश्चिममा सिर्सिया पुल, उत्तरमा पावर हाउस चौक र दक्षिणमा शंकराचार्य गेटलाई चार किल्ला मानेर कर्फ्यु लगाइएको छ । 

पर्साको वीरगञ्ज महानगरपालिका २ छपकैयामा हनुमान जयन्तीको अवसरमा निकालिएको शोभायात्राको क्रममा अन्य समुदायका व्यक्तिहरुले ढुङ्गा हानेको भन्दै युवाहरु तोडफोडमा उत्रिएका थिए । अवस्था नियन्त्रण लिन खोज्दा प्रहरीसँगै झडप भएपछि प्रहरीले लाठीचार्ज र अश्रुग्याँस प्रहार गरेको थियो । 

स्थानीय बासिन्दा र प्रत्यक्षदर्शीका अनुसार, धार्मिक जुलुस निस्कँदै गर्दा केही व्यक्तिहरूले ढुङगामुढा गरेपछि स्थिति बिग्रिएको हो । त्यसपछि दुई पक्षबीच चर्काचर्की र झडप सुरु भएको थियो । झडपका क्रममा ढुंगामुढा भएको थियो भने केही व्यक्तिहरूले पसलहरूमा तोडफोड गरेका छन् ।

झडपका क्रममा छपकैया क्षेत्रमा रहेका केही सटर र घरहरूमा क्षति पुगेको छ भने केही मोटरसाइकलमा आगजनीसमेत भएको प्रहरीले जनाएको छ ।