तीनकुनेको घरमा आगो लगाउने 'राजावादी युवा', जसले खोपेका छन् छातीमा पूर्वराजाको ट्याटु

काठमाडौँ । चैत १५ गते, काठमाडौँको तीनकुनेमा राजावादीको आन्दोलन चर्किइरहेको थियो । 

Watch On

राजसंस्था पक्षधर र प्रहरीबिच मुठभेडको अवस्था सिर्जना भइसकेको थियो । सोही समयमा बागमती पुलबाट गैह्रीगाउँतर्फ जाने सडकको छेउमा रहेको घरमा आगो सल्किन्छ । 

प्रदर्शनका क्रममा उक्त नीजि घरमा आगो झोस्ने व्यक्ति ‘राजावादी युवा’ नै भएको खुलेको छ । छातीमा राजाको ट्याटु हानेका एक युवकले नै सो घरमा आगो झोसेपछि उक्त घर आगजनी भएको भिडियो सार्वजनिक भएको छ ।

सो भिडियोमा राजावादी प्रदर्शनमा उग्र बनेका ‘आन्दोलनकारीहरु’ घरभित्र पसेर तोडफोड, लुटपाटदेखि आगजनी समेत गरेको देखिन्छ । आगो झोस्दै ती युवा भन्छन्, ‘बल्यो बल्यो, हामी रोकिनेवाला छैनौँ । दम भए छेकेर देखाउ । अब हेर्छौ, हाम्रो टेलर के हो ।’

यसरी आगो झोस्ने युवकले पूर्वराजा ज्ञानेन्द्र शाह र रानीको तस्विर प्रिन्ट गरेको टिसर्ट लगाएका छन् । उनीसहित अर्का एक जनाले आगो लगाउन सुरु गरेका थिए । अन्य राजावादी युवाहरुले भने कोहीले आगो लगाएको भिडियो खिच्दै थिए त कोही अब जाउँ जाउँ भनिरहेका थिए । त्यस्तै कोहीले भित्र तोडफोड मच्याइरहेको देखिन्छ । 

त्यहाँ आगो झोसेपछि उनीहरु त्यहाँबाट भाग्छन् । 

उनीहरुले झोसेको आगोले केहि बेरमै सो घर सखाप हुन्छ । उनीहरुले तल आगो झोसिरहँदा त्यही घरको माथिल्लो तलामा उनीहरुले मच्याएको लुटपाट र तोडफोड कैद गरिरहेका पत्रकार सुरेश रजक जलेर खरानी भएको अवस्थामा भेटिन्छन् । 

यस्तो छ सुरुमा आगो झोस्ने युवकको विवरणः
घरमा आगो झोस्न सुरु गरेका दुवैजना राजावादी संगठनका सदस्य रहेको खुलेको छ । राजारानीको तस्विर अंकित टिसर्ट लगाएर ‘दम भए छेकेर देखाउ’ भन्दै आगो झोस्ने ती युवक २२ वर्षीय तारा राजावादी भनिने सरोज गौतम हुन् । 

रामेछाप सुनापानी गाउँपालिका–१ का उनी राजावादी संगठनको युवादस्ता एनिटाइम फोर्स (एटीएफ)का प्रवक्ता तथा जनसम्पर्क विभाग प्रमुख समेत रहेका छन् । 

उनले टिसर्टमा मात्रै होइन, आफ्नो छातीमा समेत पूर्वराजा ज्ञानेन्द्र शाहको ट्याटुनै हानेका छन् । 

त्यस्तै उनीसँगै आगो झोसिरहेका अर्का व्यक्ति अछाम पन्चदेवल नगरपालिका–५ का अनुपविक्रम शाही ठकुरी राजावादी भनिने गोकर्ण साही रहेको प्रहरीले जनाएको छ । उनी पनि एटीएफका सदस्य रहेका छन् । 

अपराध अनुसन्धान महाशाखाका एसपी अंगुर जिसीका अनुसार उनीहरु दुवैजनालाई महाशाखाले चैत १९ गते नै नरेफाँटबाट पक्राउ गरिएको छ । 

अहिले उनीहरु माथि अपराधीक उपद्रो र सांगठनिक अपराधको कसुरमा म्याद थप गरेर अनुसन्धान भइरहेको छ । 

आगो झोसेको भिडियो नै बाहिरिएपछि उनीहरु माथ आगजनी, कर्तव्य ज्यानसम्मका कसुरमा अनुसन्धान हुनसक्ने प्रहरीले जनाएको छ ।

सोहि घरमा आगजनी भएपछि निस्किएकी ऐनि कुँवर लगायतका व्यक्तिहरु यसअघिनै पक्राउ परिसकेका छन् । 

चैत १५ गते राजसंस्था पुर्नस्थापनका लागि भन्दै दुर्गा प्रसाई नेतृत्वको नागरिक बचाउ महाअभियानले गरेको प्रर्दशन अराजक भएको थियो । राजावादी प्रर्दशनका नाममा अराजकता मच्याएको भन्दै आन्दोलनका कमाण्डर भनिएका दुर्गा प्रसाईलाई पनि पक्राउ गरि अनुसन्धान थालिएको छ ।  

उनलाई शुक्रबार भारतको आसामाबाट पक्राउ गरि शनिबार नेपाल ल्याइएको थियो ।

प्रसाईँको परिवारले आत्मसमर्पण गरेको दाबी गरेका थिए भने प्रहरीले पनि नेपाल ल्याएपछि मात्रै औपचारिकरुपमा पक्राउ परेको जनाएको थियो । 

यहि प्रर्दशनका कारण राप्रपाका वरिष्ठ उपाध्यक्ष रविन्द्र मिश्र तथा महामन्त्री धवल समसेर राणना पनि पक्राउ परेका छन् । 

यो प्रदर्शनमा पूर्व राजाको प्रत्यक्ष संलग्नता रहेको राजनीतिक दलहरुले दाबी गर्दै आएका छन् । 

तर यसका आयोजक समेत रहेका नवराज सुवेदीको समितिले भने प्रदर्शनमा राजाको चासो कतैबाट नभएको दाबी गर्दै आएका थिए । 

त्यस्तै घटना भएको १५ दिन पछि भने पूर्व राजा ज्ञानेन्द्र शाहले १३ मिनेट लामो भिडियो सन्देश जारी गरेका छन् । त्यसमा तीनकुने घटना भएको सुनेकोमा आफू दुखी भएको बताएका छन् ।