रवि लामिछानेमाथि साँधिएको प्रतिशोध नयाँ सोच र नेतामाथिको घातक प्रहारः डिपि अर्याल

काठमाडौँ । राष्ट्रिय स्वतन्त्र पार्टीका कार्यवहाक सभापति डोलप्रसाद अर्यालले रास्वपाको मूल नेतृत्वविरुद्ध साँधिएको प्रतिशोध नयाँ सोच र प्रतिबद्धता माथिको घातक प्रहार भएको बताएका छन् । सोमबार नयाँ वर्षको सुभकामना सन्देश सार्वजनिक गर्दै उपसभापति समेत रहेका अर्यालले आफूहरुमाथि भएको प्रहारविरुद्ध नागरिकले गरेको प्रतिवादको सम्मान गर्ने बताएका छन् । 

Watch On

‘राजनीतिको पुरातन सोचविरुद्ध नागरिकले रास्वपामार्फत् व्यक्त गरेको आशा र अपेक्षाप्रति नियोजित रुपमा बढाइएको घेराबन्दी र राजनीतिक स्वार्थका आधारमा रास्वपाको मूल नेतृत्वविरुद्ध साँधिएको प्रतिशोध एउटा दल र नेताप्रति गरिएको कुकर्म मात्र होइन, समग्र देशको रुपान्तरण गर्ने नयाँ सोच र प्रतिबद्धता माथिकै घातक प्रहार हो । र, यस प्रहारविरुद्ध न्यायप्रेमी नागरिकले सुरु गर्नुभएको प्रतिवादको सम्मान गर्दछौं ।’, विज्ञप्तीमा भनिएको छ । 

त्यस्तै सरकारकै कार्यशैलीले नागरिकमा बढेको निराशा र आक्रोशप्रति सरकार गम्भिर हुनुपर्ने समयमा सरकार भने आत्मालोचनासहित कमजोरी स्वीकार्नभन्दा विपक्षी विचार र दललाई प्रहार गर्न उद्दत रहेको बताएका छन् । त्यस्तै नागरिकका स्वभाविक चासो, चिन्ता र सरोकारलाई बेलैमा सम्बोधन गर्न समेत अर्यालले सरकारलाई अनुरोध गरेका छन् । ‘राजनीति सिर्जित अराजकता, स्वेच्छाचारी शासन सत्ता, जनसमस्या पहिचान र समाधानमा निरन्तर वेवास्ता जस्ता कारणले नागरिकमा बढेको निरासा आक्रोशमा बदलिने खतरामा सचेत र गम्भीर हुनुपर्ने सरकार र पुरातन राजनीतिक नेतृत्व आत्मालोचनासहित कमजोरी स्वीकार्नभन्दा विपक्षी विचार र दललाई प्रहार गर्न उद्दत छ ।’, अर्यालले भनेका छन्, ‘रास्वपा, यस प्रकारको अतिवादी हठ त्यागेर राजनीतिक समस्याको समाधान सहमति र संवादमार्फत् खोज्न तथा नागरिकका स्वभाविक चासो, चिन्ता र सरोकारलाई बेलैमा सम्बोधन गर्न अनुरोध गर्दछ ।’

त्यस्तै नयाँ वर्ष सुरु हुनु भनेको प्रतिबद्धता पूरा गर्ने संकल्पको दिन सुरु हुनु रहेको उनले बताए । व्यवस्थाभित्र औंल्याइएका कमजोरीको सुधार, राष्ट्रिय जीवनका मुख्य समस्याको समाधानमा मार्गचित्र निर्माण र सुसंस्कृत प्रतिस्पर्धात्मक राजनीतिक संस्कारको अभिवृद्धिका लागि रास्वपाको सकारात्मक योगदान रहने समेत उनले बताएका छन् ।