काठमाडौं । तीनकुने प्रकरणमा दुर्गा प्रसाईँविरुद्ध ड्युटीमा खटिएका प्रहरीले ज्यान मार्ने उद्योगको कसुरमा सामूहिक निवेदन दिएका छन् । जिल्ला प्रहरी परिसर काठमाडौ स्रोतका अनुसार प्रदर्शनका क्रममा सुरक्षा घेरामा बसेका प्रहरीलाई गाडीले पेल्दै अघि बढेका प्रसई विरुद्ध सो स्थानमा ड्युटीमा खटिएका प्रहरीले सामूहिक निवेदन दिएका हुन् । 

यस अघि अपराधिक उपद्रव,  राजद्रोहको कसुर, संगठित अपराधमा अनुसन्धान गरिरहेको प्रहरीले, प्रहरीको सामूहिक निवेदनपछि भने ज्यान मार्ने उद्योगको कसुरमापनि अनुसन्धान थालेको छ । 

प्रसाई विरुद्ध जिल्ला अदालत काठमाडौँमा १२ दिनको म्याद लिएर अनुसन्धान गरिरहेको छ । चैत १५ गते तीनकुनेमा प्रसाईको राष्ट्र, राष्ट्रियता, धर्म, संस्कृति र नागरिक बचाउ महाअभियानको आयोजनामा राजासंस्था पुर्नस्थापनका लागि प्रदर्शन भएको थियो । त्यसक्रममा प्रदर्शनकारी र प्रहरी बिच सुरु भएको तनाव उग्र भएको थियो । 

प्रहरीले मञ्चमै अश्रूग्यास प्रहार गरेपछि राजावादी प्रदर्शकारीहरुले निजीघरमा आगो लगाएका थिए । साथै जडिबुटीस्थित सन्चो उत्पादन उद्योगमा तथा सरकारी तथा निजी सवारीमा आगो लगाएका थिए । सोहि दिन प्रहरीले राप्रपाका वरिष्ठ उपाध्यक्ष रविन्द्र मिश्र तथा महामन्त्री समेत रहेको सांसद धवल शमसेर जबरालाई पक्राउ गरेको थियो । 

तर प्रदर्शनका कमाण्डर भनिएको दुर्गा प्रसाई भने सोहि दिनेखि फरार भएको थिए । भारत पुगेका प्रसाईलाई प्रहरीले घटनाको १३ दिनपछि आसामबाट पक्राउ गरेको थियो ।