‘म अलिकती कांग्रेस हो, अलिकती कम्युनिष्ट हो’ – बाबुराम भट्टराई

काठमाडौँ । नेपाल समाजवादी पार्टी (नयाँशक्ति) का अध्यक्ष डा.बाबुराम भट्टराईले आफू अलिकती कांग्रेस, अलिकती कम्युनिष्ट भएको बताएका छन् । बुधबार काठमाडौंमा आयोजित एक कार्यक्रममा भट्टराईले आफूमा दुबै गुण भएको बताएका हुन् । 

उनले भने, ‘कांग्रेसले निजी स्वतन्त्रताका मात्रै कुरा गर्ने, कम्युनिष्टहरुले समानताका मात्रै कुरा गर्दा त्यो अपुरो थ्यो भन्ने मेरो बुझाई हो । त्यसै भएको हुनाले म अलिकती कांग्रेस हो, अलिकती कम्युनिष्ट हो । म दुबैको गुण भएको र अली अगाडी बढेको नयाँ मान्छे हो भनेर म स्पष्ट पार्न चाहन्छु ।’ 

त्यस्तै उनले दलहरुबीचको सहकार्यबाटै सङ्घीय लोकतान्त्रिक गणतन्त्रको रक्षा गर्न सकिने बताएका छन् । भट्टराईले एकले अर्कालाई निषेध गर्नुभन्दा सहकार्य गरि अघि बढ्न सके सङ्घीय लोकतान्त्रिक गणतन्त्रको रक्षा गर्न सकिने बताएका हुन् । राजनीति बाङ्गोटिङ्गो हुदै अघि बढ्ने प्रक्रिया भएपनि लोकतन्त्र नै प्रमुख कुरा भएको उनले बताए । 

भट्टराईले अहिले बिभिन्न ढंगले प्रतिगामीहरु सल्वलाउदै बिभाजन ल्याउन खोजेको भन्दै सजक हुनुपर्नेमा जोड दिए । उनले अहिलेको जटिल भूराजनीतिक अवस्थामा सङ्कीर्ण गुटगत र दलगत चिन्तनभन्दा माथि उठेर राष्ट्रिय हितलाई माथि राखेर लोकतान्त्रीक मूल्यमान्यतामा दृढ रहेर सहकार्य गर्दै अघि बढ्न आह्वान समेत गरे । 

उहाले सङ्घीय लोकतान्त्रिक गणतन्त्र आएसकेपछि कांग्रेस र कम्युनिष्ट रुखका दुईवटा हाँगा हुन् भन्ने आफ्नो मान्यता रहेको बताए ।