एक महिना अघिनै कारागार मुक्त भएका थिए रामबहादुर बमजन

जनकपुर । बाल यौन दुरुपयोग मुद्दामा कैद भुक्तान गरिरहेका रामबहादुर बमजनले एक महिना अघिनै उच्च अदालत जनकपुरबाट सफाई पाएका छन् । 

Watch On

जिल्ला अदालत, सर्लाहीबाट दोषी ठहर भएपछि महोत्तरी कारागारमा कैद भुक्तान गरिरहेका बम्जन चैत ६ गतेको उच्च अदालत जनकपुरको आदेशसँगै ७ गतेनै रिहा भैसकेका छन् । उच्च अदालत जनकपुरका रजिस्ट्रार प्रेम खड्काका अनुसार उच्च अदालतका न्यायाधीश नरीश्वर भण्डारी र खेमराज भट्टको संयुक्त इजलासले जिल्लाको फैसला उल्टी हुने ठहर गरेको थियो । 

उनलाई २०८१ असार १० गते सर्लाही जिल्ला अदालतका न्यायाधीश जीवनकुमार भण्डारीको इजलासले दोषी ठहर गर्दै  १० वर्ष कैद र ५ लाख रुपैयाँ जरीवाना तोकेको थियो । 

उनी माथि आफ्नो आश्रममा यौन सन्तुष्टि प्राप्त गर्ने तथा बाल यौन शोषण गरेको अभियोगमा २०७६ माघ २३ गते पक्राउ पुर्जी जारी गरेको थियो । 
उनी माथि  २०७३ साल साउन २० गते राति आश्रममा आनी बनेर बसेकी एक बालिकालाई ललाई फकाई प्रलोभनमा पारेर बोलाएर आफू सुत्ने कोठामा लगेर कोठाको ढोकाको चुकुल लगाएर प्लास्टिकको कार्पेटमा लडाएर उनलाई रुन कराउनसमेत नसक्ने गरी मुख थुनेर, डर, त्रास धम्की दिएर जबर्जस्ती करणी गरेको जाहेरीमा उल्लेख छ।

त्यसपछि पनि पीडित एक्लै भएको मौका छोपी पटकपटक यौन सम्पर्क राखी यौन सन्तुष्टि प्राप्त गरेको तथा बाल यौन शोषण गरेको आरोप छ।

बमजन २०८० पुस २४ गते साँझ काठमाडौँको हात्तीगौँडास्थित निवासबाट पक्राउ परेका थिए।