काठमाडौँ । राष्ट्रिय स्वतन्त्र पार्टीकी नेता सुमना श्रेष्ठले आफूले बालेनसँग भेटेको समाचार गलत भएको बताएकी छिन् । बिहीबार पार्टी कार्यालयमा केन्द्रीय समितिको बैठकपछि सञ्चारकर्मीका प्रश्नको जवाफ दिदै उनले बालेनलाई नभेटेको स्पष्टिकरण दिएकी हुन् । 

‘मैले बालेनजीलाई भेटेको वशन्तपुरमा त्यो स्टेजमा हो । त्यसपछि भेटेको छैन । यो जुन तरिकाले न्युहरु बनाइएको छ भन्दाखेरी डिफेन्सिभ पोजिसनमा राखौँ । डिफेन्सिभ पोजिसनमा जे पनि सोध्न पाइन्छ भन्ने तरिकाले गरियाछ । यो तरिकाले हामीले राजनीतिलाई अगाडि लैजान सक्दैनौँ ।’ उनले भनिन् । 

त्यस्तै उनले एउटै मान्छे धेरै पदमा बस्दा डेलिभरी दिन नसकेको स्वीकार गर्दै राजीनामा दिएको बताएकी छिन् । ‘मैले पार्टीबाट राजीनामा दिएको  होइन । केन्द्रीय सदस्यबाट राजीनामा दिएको होइन । एउटा व्यक्तिले एकभन्दा बढी पद लिएर बस्दा डेलिभरी दिन सकिन । सहमहामन्त्रीका रुपमा त्यो स्वीकारोक्तिको साथ म भनिरहेको छु ।’ उनले भनिन् । 

त्यस्तै उनले यो राजीनामा २ हप्ताअघि नै दिएको जानकारी गराएकी छिन् । तर गलत समयमा पार्टीभित्रैबाट कसैले सार्वजनिक गरिदिएको उनको आरोप छ । 

उनले भनिन् , मैले यो राजीनामा २ हप्ता अगाडी दिएको हो, पार्टी सभापति सभापतित्व ग्रहण गर्नुभएको समयमा । शुक्रबार उहाँलाई पत्र दिएपछि तत्कालिन कार्यवाहक सभापतिज्यूलाई यो न्युज होल्ड गरौँ भनेकै हो । तर आज मलाई तारन्तार सिनियर जर्नलिष्टहरुको फोन आयो । यो कहाँबाट थाहा पाउनुभयो भनेर सोधेँ ।  तपाईँको पाटी भित्रैबाट कसैले एसएमएस गरेको छ । मैले सिसिएम (केन्द्रीय समिति बैठक) मा यो कुरा राखेको छैन । यो प्लीज होल्ड गरौँ, मैले  सिसिएममा छलफल गर्न पाउँछु भन्दा बजारमा छ्यापछा्याप्ती भईसक्यो । अब रोक्नसक्नुहुन्न भनेर बिहान पनि पत्रकार साथीहरुले भन्नुभएको थियो । पार्टी भित्रैबाट कसैले एसएमएस गर्नु गलत हो ।’