माग सम्बोधन नगरी संघीय निजामती सेवा विधेयक अघि बढाए आन्दोलन गर्ने कर्मचारीहरुको चेतावनी

काठमाडौँ । संयुक्त ट्रेड यूनियन सञ्जालकले कर्मचारीहरुको मागलाई सम्बोधन नगरी संघीय निजामती सेवा विधेयक अघि बढाए आन्दोलन गर्ने चेतावनी दिएको छ । 

शुक्रबार प्रतिनिधिसभा अन्तर्गतको राज्य व्यवस्था तथा सुशासन समितिका सभापति रामहरि खतिवडालाई संयुक्त ज्ञापन पत्र बुझाउँदै कर्मचारी संगठनले आफुहरुले दिएका सुझाव समेतका आधारमा संघीय निजामती सेवा ऐनलाई अघि बढाउनुपर्ने भन्दै कर्मचारीको मागलाई वेवास्ता गरे आन्दोलन गर्ने चेतावनी दिएका हुन् । 

राष्ट्रियस्तरका ट्रेड युनियनहरुसंग संवाद र छलफल गरि प्रतिनिधिसभाको प्रथम बैठक अगावै विधेयक पेश गर्न सञ्जालले माग गरेको छ । संयुक्त ट्रेड यूनियन सञ्जाल निरन्तर दवावमूलक कार्यक्रममा रहेको अवस्थामा आफ्ना मागहरुप्रति सरकार र संसद उदासिन भइ सुनुवाई नगरे सञ्जालका तर्फबाट थप आन्दोलनका कार्यक्रम सार्वजनिक गर्न बाध्य हुने चेतावनी दिएको छ । 

संघीय निजामती सेवा ऐन जारी भएपछि संघीय कानुन बमोजिम संघ, प्रदेश र स्थानीय तहमा समायोजन भएका कर्मचारीहरूलाई एक पटकका लागि समयोजनको लागि छनौटको अवसर प्रदान गर्नुपर्ने आफुहरुको माग रहेको नेपाल निजामती कर्मचारी संगठनका महासचिव रामचन्द्र अधिकारीले जानकारी दिए । 

सञ्जालको ज्ञापन पत्र बुझ्दै समितिका सभापति रामहरि खतिवडाले कर्मचारीहरुले राखेका सरोकारका बिषयलाई समावेश गर्दै विधेयकलाई अघि बढाउने प्रतिवद्धता जनाए । 

सञ्जालले योग्यता पुगेका कर्मचारीलाई श्रेणी वृद्धि गरी तह मिलान गर्नु पर्ने र प्राविधिक सेवामा कार्यरत कर्मचारीहरुको बढुवाको हकमा सेवा प्रवेश गर्दाको शैक्षिक योग्यता वा सेवा प्रवेशको लागि तोकिएको तालिमलाई आधार मानी बढुवा गर्ने ब्यबस्था गर्नुपर्ने माग गरिएको छ । त्यस्तै सञ्जालले अस्थायी करारमा काम गरेका कर्मचारीलाई एकपटक उमेरको हद नलाग्ने गरी सिमित प्रतियोगितावाट स्थायी गर्ने र हुन नसक्ने कर्मचारीलाई स्थायी सरहको उपदान दिएर अवकाश दिने व्यवस्था गर्नुपर्नेमा जोड दिएको छ ।