राप्रपाको प्रदर्शनः निषेधित क्षेत्र नतोड्न सरकारको चेतावनी 

काठमाडौं । राष्ट्रिय प्रजातन्त्र पार्टी राप्रपाले आज राजसंस्था पुनस्र्थापनाको माग सहित प्रदर्शन गर्दै छ । बिहीबारको केन्द्रीय कार्यसम्पादन समिति बैठकबाट निर्णय नै गरेर राप्रपाले वैशाख ७ गते निषेधित क्षेत्र तोड्ने घोषणा गरेको थियो । 

Watch On

 अघिनै निषेधित क्षेत्र तोडेर प्रदर्शन गर्ने राप्रपाले घोषणा गरेसँगै सरकारले भने चेतावनी दिएको छ । 

गृह मन्त्रालयले एक विज्ञप्ती जारी गर्दै निषेधित क्षेत्र तोडे कानुनी बमोजिम कारबाही गर्ने जनाएको हो । 
शनिबार गृह मन्त्रालयका सहसचिव, प्रवक्ता रामचन्द्र तिवारीले जारी गरेको विज्ञप्तिमा राष्ट्रिय प्रजातन्त्र पार्टीले प्रचलित कानुन बमोजिम तोकिएका निषेधित क्षेत्र तोड्ने भनी सार्वजनिक भएका समाचार र अभिव्यक्तिहरू प्रति गृह मन्त्रालयको गम्भीर ध्यानाकर्षण भएको जनाएको छ ।

‘संविधान र कानुनको ठाडो उल्लङ्घन गर्न प्रोत्साहित गर्ने र समाजमा अराजकता फैलाउने कुनै पनि गतिविधि सह्य नहुने र यस्तो गतिविधिमा संलग्न हुने जो सुकैलाई कानुन बमोजिम कारबाही हुने ब्यहोरा सूचित गरिन्छ’ विज्ञप्तिमा भनिएको छ ‘समाजमा हिंसा फैलाउने कुनै पनि अराजक , उत्तेजक र गैर कानुनी क्रियाकलापमा संलग्न नहुन समेत गृह मन्त्रालय सबैमा अनुरोध गर्दछ । ’

आजको प्रदर्शनलाई सशक्त बनाउने रणनितिमा रहेको राप्रपाले निषेधित क्षेत्र तोडेर सामूहिक गिरफ्तारी दिने रणनितिमा नेताहरु रहेको जनाइएको छ ।