रवि लामिछानेमाथि सरकारले गरेको प्रतिशोधपूर्ण व्यवहारले कानुनी शासनकै धज्जी उडायो: उपसभापति अर्याल

काठमाडौँ । राष्ट्रिय स्वतन्त्र पार्टीका कार्यवाहक सभापति डोलप्रसाद अर्यालले सरकारले रवि लामिछानेप्रति गरेको प्रतिशोधपूर्ण व्यवहारले कानुनी शासनकै धज्जी उडाएको बताएका छन् । शुक्रवार सुरु भएको बजेट अधिवेशनमा पार्टीको तर्फबाट सम्बोधन गर्दै उपसभापति समेत अर्यालले सरकारले रवि लामिछानेलाई कानुन कुल्चेर प्रतिशोधपूर्ण व्यवहार गरिएकाे बताए । 

Watch On

उच्च अदालत तुलसीपुर, रुपन्देही इजलासले लामिछानेलाई थुनामा पठाउन आदेश गरेपछि सरकारका तर्फबाट भएको बलजफतीले सरकारको नियत र नेपाल प्रहरीको गैरव्यवसायिकता देखाएको उनले बताए । ‘चैत २२ गते प्रहरीले रवि लामिछानेलाई गरेको पक्राउ कानुनको उचित प्रक्रिया, ड्यू प्रोसेस अफ ल विपरीत रहेको र पक्राउ पर्नुभएका लामिछानेलाई २५ गते मात्र जिल्ला अदालत रुपन्देहीमा उपस्थित गराएर थुनुवा पुर्जी दिएकाले उहाँको २ दिन, ३ रातको हिरासत स्वतः अवैध भएको छ ।’, अर्यालले भने, ‘सभापति लामिछानेलाई पक्राउ गर्न आफैँ सक्रिय भएको प्रहरीले उहाँको निवासमा गरेका क्रियाकलाप झनै आपत्तिजनक थियो । कानुनले निर्धारित गरेका आधारभूत कागजात र अदालतको आदेश समेत नलिई घर प्रवेश गर्नु, सभापति लामिछानेले मागेपछि मात्रै मिलाप गरी पक्राउ पुर्जी दिनु, उच्च अदालतले समेत आदेश गरिसकेको मुद्दामा अनुसन्धानका लागि भन्दै पक्राउ गर्नु र प्रहरीका उच्च अधिकारीले नै सोध्नुजस्ता क्रियाकलापले पनि सरकारको नियत र गैरव्यवसायिकता मात्रै प्रस्ट्याएको छैन, कानुनी शासनकै धज्जी उडाएको छ ।’

त्यस्तै उनले पार्टी सभापति लामिछानेलाई चितवनका मतदाताले विश्वासका साथ सुम्पिएको जिम्मेवारी पुरा गर्न नपाओस् भनेरै सरकारले सम्पत्ति शुद्धीकरणको अभियोग लगाएर सांसद पद निलम्बन बताएका छन् । उनले भने, ‘यो बैठकमा मैले हाम्रा सभापति रवि लामिछानेलाई साँधिएको राजनीतिक प्रतिशोध दर्ज गराउनै पर्छ । संसदीय छानबिन विशेष समितिको निष्कर्ष र सिफारिस विपरीत उहाँलाई ४÷४ ओटा जिल्लामा फरक फरक कानुन टेकेर फौजदारी मुद्दा लगाइयो । चितवनका मतदाताले अगाध विश्वासका साथ सुम्पिएको जिम्मेवारी पुरा गर्न नपाओस् भनेरै होला सम्पत्ति शुद्धीकरणको अभियोग समेत लगाएर उहाँको सांसद पद निलम्बन गरियो । लोकतान्त्रिक राज्यले थुनाबाहिरै रहेर नागरिकलाई मुद्दाको प्रतिरक्षा गर्ने वातावरण प्रोत्साहित गर्नुपर्ने हो तर सरकार उहाँलाई भने जसरी पनि थुन्ने उद्देश्यमा लाग्यो ।’