लिङदेनको आरोप, ‘भाटभटेनीको रक्सी लुट्ने कांग्रेस सहमहामन्त्रीको छोरालाई तुरुन्तै छोडियो’

काठमाडौँ । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले चैत १५ गते तीनकुने प्रदर्शनका क्रममा भाटभटेनी सुपरमार्केट लुट्न कांग्रेसकै नेता पुगेको आरोप लगाएका छन् ।  शुक्रबार संसदको हिउँदे अधिवेशन अन्तर्गतको प्रतिनिधिसभाको बैठकलाई सम्बोधन गर्दै लिङ्देनले पक्राउ परेका व्यक्ति कांग्रेस सहमहामन्त्रीका छोरा भएको बताए । त्यस्तै उनले ती नेताका छोरालाई दुई घण्टाभित्रै छोडिएको आरोप लगाए । 

Watch On

‘भाटभटेनीको लुटपाटमा सत्तारुढको तपाईंकै पार्टीको सहमहमन्त्रीको छोरो रहेछ। किन छोड्नु भयो तुरुन्तै ? हामीसँग रेकर्ड छ, गृहमन्त्रीज्यू । भाटभटेनीको लुटपाटमा तपाईंकै पार्टीको सहमहामन्त्रीको छोरा पक्राउ परेका छन्,’ लिङ्देनले भने ।

त्यस्तै उनले सहमहामन्त्रीको छोरा छुटेको तर उनीसँगै गएका व्यक्तिलाई नछुटाएपछि यो कुरा सार्वजनिक गर्दिन्छु भनेर धम्क्याएपछि दुई घण्टामा छाडिदिएको समेत बताए । उनले भने, ‘तपाईंको नेताको छोराले रक्सी लिएर गयो । उसले ल्याएको मान्छेले म रक्सी खान्न मलाई कपडा काम लाग्छ भनेर कपडा लिएर गयो । पछि थाहा भयो, तपाईंको प्रहरीले भिडियोमा हेरे पक्रियो । तर, नेताको छोरा रहेछ । नेताको छोरालाई छाड्नुभयो । ल्याएको मान्छे छुटेन । पछि यो कुरा सार्वजनिक गर्दिन्छु भनेर धम्क्याएपछि दुई घण्टामा छाडिदिनुभयो ।’

अध्यक्ष लिङ्देनले पार्टीको सहमहामन्त्री भनेपनि को सहमहामन्त्री भन्ने विषय भने खुलाएनन् । हाल नेपाली कांग्रेसमा ८ जना सहमहामन्त्री छन् ।