प्रधानमन्त्रीलाई रास्वपाको चुनौती, ‘पोखरा विमानस्थलमा भएको भ्रष्टाचारको छानबिन गर्न न्यायिक छानबिन समिति गठन गर्ने हिम्मत छ?’

काठमाडौँ । राष्ट्रिय स्वतन्त्र पार्टीले पोखरा विमानस्थलमा भएको भ्रष्टाचारको छानबिन गर्न न्यायिक छानबिन समिति गठन गर्न चुनौती दिएको छ । आइतबारको प्रतिनिधिसभामा बोल्दै रास्वपा सांसद गणेश पराजुलीले २२ अर्ब ऋण सम्झौता लागतमा निर्माण भएको विमानस्थलमा १० अर्ब भन्दा बढी भ्रष्टाचार भएको र सो को अनुसन्धान गर्न न्यायिक छानबिन समिति आवश्यक रहेको बताएका छन् । 

Watch On

‘२०७१ सालमा प्रधानमन्त्रीज्यू, तपाईँले नै निर्माण सम्झौता गरेको पोखरा विमानस्थलमा २०७९ मा निर्माण सम्पन्न भयो । तर पनि आजसम्म परिक्षण उडानबाहेक सञ्चालनमा आउन सकेको छैन । २२ अर्ब ऋण सम्झौता लागतमा निर्माण भएको विमानस्थलमा १० अर्ब भन्दा बढी भ्रष्टाचार भएको संसदको लेखा समितिको उपसमितिले उजागर गरेको तथ्य बाहिर आएको छ ।’, रास्वपा सांसद पराजुलीले भने, ‘प्रधानमन्त्रीज्यू, अब नाकैमुनि भएको भ्रष्टाचारको गन्धले संसार दुर्गन्धित हुँदा पनि भ्रष्टाचार आफू पनि गर्दिनँ र अरुलाई पनि गर्न दिन्नँ भनेर कार्यकताको आँखामा छारो हालिरहने कि उच्चस्तरिय शसक्त न्यायिक छानबिन समिति गठन गरेर यो परियोजनामा भएको सबै भ्रष्टाचार र अनियमितताको छानबिन, भ्रष्टाचारसँग जोडिएका ती सबैलाई कानुनको कठघरामा उभ्याउने र विमानस्थल सुचारु गर्ने प्रतिबद्धता जाहेर गर्ने ? हिम्मत छ प्रधानमन्त्रीज्यू ?’

त्यस्तै उनले विमानस्थललाई आवश्यक लम्बाईको धावनमार्ग बन्न नसकेको तर त्योभन्दा लामो भ्रष्टाचारको सूची बनेको समेत बताएका छन् । सांसद पराजुलीले पोखराको भ्रष्टाचार काण्डले नेपालमा हुने भ्रष्टाचारका काण्ड अन्तर्राष्ट्रिय जगतमै दुर्गन्धित भएको बताएका छन् । उनले भने, ‘विमानस्थललाई आवश्यक लम्बाईको धावनमार्ग त बन्न सकेन तर धावनमार्ग भन्दा कयौँ गुणा लामो भ्रष्टाचारको लिस्ट बनेको भनेर अन्तर्राष्ट्रिय सञ्चार जगतले सिरिजमा बारम्बार यो विषय उजागर गरिरहेका छन् । यो प्रकरण उजागर गर्नुमा उसका आफ्ना नीजि स्वार्थ त होलान्, यद्यपी नेपालमा हुने भ्रष्टाचारका काण्ड अन्तर्राष्ट्रिय जगतमै दुर्गन्धित भएको कुरा उजागर भएको सत्य हो नि ।’