मुख्य समाचार

सकियो वीरगन्जस्थित सानोपाइला सहकारीको अनुसन्धान, ३० जनालाई प्रतिवादी बनाउन प्रहरीको राय

सिधाकुरा

आइतबार, वैशाख १४, २०८२

सकियो वीरगन्जस्थित सानोपाइला सहकारीको अनुसन्धान, ३० जनालाई प्रतिवादी बनाउन प्रहरीको राय

पर्सा । जिल्ला प्रहरी कार्यालय पर्साले वीरगन्जस्थित सानोपाइला बचत तथा ऋण सहकारी प्रकरणको अनुसन्धान सकेको छ । प्रहरीले अनुन्धानपश्चात जिल्ला सरकारी वकिलको कार्यालयमा प्रतिवेदन पेस गरेको छ ।

जिल्ला प्रहरी कार्यालय पर्साका प्रहरी उपरीक्षक गौतम मिश्रका अनुसार अनुसन्धानका क्रममा वीरगन्जस्थित सानोपाइला बचत तथा ऋण सहकारी संस्थाबाट २ अर्ब ३० करोड १४ लाख २९ हजार ८ सय २९ रुपैयाँ अपचलन भएको देखिएको छ । यो प्रकरणमा प्रहरीले राष्ट्रिय स्वतन्त्र पार्टीका सभापति रवि लामिछानेसहित ३० व्यक्ति, ३ वटा सहकारी संस्था र ८ वटा कम्पनी गरी ४१ जनालाई प्रतिवादी बनाउन राय दिएको छ ।

सानोपाइला सहकारीमा रकम बचत गरेका ४ सय ३८ जना बचतकर्ताले आफ्नो रकम अपचलन भएको दाबी गर्दै जिल्ला प्रहरी कार्यालय पर्सामा जाहेरी दिएका थिए । साउन २१ गते ५२ जनाले, भदौ २२ गते २०७ जनाले र फागुन २ गते १७९ जनाले छुट्टाछुट्टै जाहेरी दिएका थिए ।

रवि लामिछानेलाई पर्सा प्रहरीले गत मंसिर २४ गते पोखराबाट पक्राउ गरी वीरगन्ज ल्याएको थियो । मंसिर २५ गते उनलाई जिल्ला सरकारी वकिलको कार्यालयमा उपस्थित गराई चार घण्टा बयान लिएर सोही दिन हवाईमार्गमार्फत काठमाडौं पठाइएको थियो।

प्रकाशित मिति: आइतबार, वैशाख १४, २०८२

प्रतिक्रिया दिनुहोस्