काठमाडौँ । बुधबार नागरिक उन्मुक्ति पार्टीका संरक्षक रेशम चौधरी पक्राउ परे ।  जनमत पार्टी र नागरिक उन्मुक्तिबिच पार्टी एकता घोषणा गर्न कमलादीस्थित प्रज्ञा भवनमा पुगेका उनलाई प्रहरीले पक्राउ गरेको हो । 

सादा पोशाकका प्रहरीले चौधरीलाई पक्राउ गरेर डिल्लीबजार कारागार लगेको छ । 

त्यसो त चौधरीलाई पक्राउ गरेर थुनामा राख्न सर्वोच्च अदालतको मुद्दा तथा रिट महाशाखाले बुधबार नै डिल्लीबजार कारागारलाई पत्र लेखेको पाइएको छ । महाशाखाका शाखा अधिकृत महिमानसिंह विष्टले चौधरीलाई थुनामा राख्न बुधबार नै कारागारलाई पत्र पठाएका थिए । 

उनले लेखेको पत्रमा भनिएको छ, ‘ ‘‘प्रस्तुत मुद्दामा वादी नेपाल सरकार प्रतिवादी कैलाली जिल्ला साबिक दुधौली गाविस वडा नं ८ हाल जानकी गाउँपालिका वडा नम्बर ६ घर भएका लालवीर चौधरीको छोरा रेशमलाल चौधरीसमेत भएको कर्तव्य ज्यान, ज्यान मार्ने उद्योग र डाँका चोरी मुद्दाहरूमा पाश्विक किसिमले ८ जना सुरक्षाकर्मी र एक जना नाबालकको हत्या गरेको जन्यभन्दा पनि क्रुर अपराध गरेको ठहरी यस अदालतलको मिति २०८०/२/२ गते को पाना २३० को फैसलाले प्रतिवादी रेशमलाल चौधरीलाई जन्मकैद २० वर्ष कैद हुने ठहरी फैसला भएको अवस्थामा सम्मानित राष्ट्रपति महोदयबाट सर्वोच्च अदालतबाट पूर्णपाठ तयार नभई अपराधीलाई राजनीतिकरण हुनेगरी मिति २०८०/२/१४ मा दिएको आममाफी यस अदालतको मिति २०८०/२/१६ मा दर्ता भएको उत्प्रेषण मुद्दामा यस अदालतको पूर्ण इजलासबाट यो आदेशमा फैसलाद्वारा आवश्यक कारबाही हुने नै हुँदा र भारती शेर्पा प्रत्यासी राष्ट्रपतिको कार्यालय र रिगल ढकालसमेत भएको मुद्दा २०८० कात्तिक १६ गतेमा फैसला भएको ब्याख्या नजिरको समेत अनुशरण गरी न्यायिक कारबाही हुने र सो फैसलापछि श्री कैलाली जिल्ला अदालतबाट पुनः कैदीपूर्ति जारी हुने नै हुँदा हाललाई निज प्रतिवादीलाई नियमानुसारको सिधा खर्च दिई कैदमा राख्नुहुन यस अदालतको मिति २०८०/२/२ गतेको फैसलाअनुसार अनुरोध छ।’

त्यस्तै उक्त पत्रमा नेपाल प्रहरी प्रधान कार्यालय, जिल्ला अदालत कैलाली र रेशम चोधरीलाई बोधार्थ दिइएको छ । जसमध्ये रेशमलाई दिइएको बोधार्थमा भनिएको छ, ‘नियमानुसारको सिधा खर्च उपभोग गरी यो कैदी पूर्जी बमोजिम कैदमा बस्नु ।’