भारतले पाकिस्तानमाथि गरेको हमला आपत्तिजनकः चीन

काठमाडौँ । चीनले पाकिस्तान र भारतबिच भइरहेको द्वन्द्वलाई लिएर विरोध जनाएको छ । बुधबार बिहान भारतले पाकिस्तानविरुद्ध सुरु गरेको ‘अपरेशन सिन्दूर’पश्चात चीनले आफ्नो धारणा राखेको हो । जहाँ भारतको कदम आपत्तिजनक रहेको चीनको विदेश मन्त्रालयले जनाएको छ ।

Watch On

बुधबार चीनको विदेश मन्त्रालयकी प्रवक्ता माओ निङले भारतले बिहान पाकिस्तानमा गरेको सैनिक कारबाहीलाई दुःखद भएको बताएकी छिन् । त्यस्तै उनले चीनले सबै प्रकारका आतंकवादको विरोध गर्ने र दुवै पक्षलाई शान्ति र स्थायित्वको हितमा काम गर्न, शान्त रहन र संयम अपनाउन आग्रह गरेको बताइन् । उनले भनिन्, ‘चीनले भारतले आज बिहान पाकिस्तानमा गरेको सैनिक कारबाहीलाई आपत्तिजनक रुपमा लिएको छ । हामी उक्त परिस्थितिप्रति चिन्तित छौँ। भारत र पाकिस्तान एक–अर्काका छिमेकी थिए र सधैँ रहन्छन्। उनीहरू दुबै चीनका पनि छिमेकी हुन्। चीन सबै प्रकारका आतंकवादको विरोध गर्दछ। हामी दुवै पक्षलाई शान्ति र स्थायित्वको हितमा काम गर्न, शान्त रहन, संयम अपनाउन र परिस्थितिलाई अझ जटिल बनाउने कार्यहरूबाट टाढा रहन आग्रह गर्दछौँ।’

भारतले पाकिस्तानमाथि गरेको बुधबार बिहान गरेको हमलामा दर्जनौँ मारिएको भारतीय पक्षले दाबी गरेको छ । समाचार एजेन्सी एएनआईका अनुसार लश्कर र जैशको मुख्यालय ध्वस्त भएको छ ।  

पहलगाम आक्रमणको १५ दिनपछि भारतले गएराति १ बजेबाट हवाई आक्रमण सुरु गरेको हो ।