हेटौँडामा भासिएको गाडीको अत्तोपत्तो भएन, फर्कियो भूगर्भविदको टोली

काठमाडौँ । शुक्रवार हेटौँडामा सडक भासिएर गाडी बेपत्ता भएको स्थानको अध्ययन गर्न पुगेको भूगर्भविद्को टोली फर्किएको छ । मंगलबार सो स्थानको अध्ययन गर्न पुगेको टोलीले गाडी नभेटेपछि घटनास्थलको अनुगमन गरेर ल्याब परिक्षण गर्न काठमाडौँ फर्किएको हो । 

Watch On

भूगर्भविद् नारायण अविकारीको नेतृत्व पुगेको टोलीले बुधबार दिउँसो २ बजेसम्म सो क्षेत्रको अध्ययन अनुसन्धान गरेको थियो । सो टिममा कृष्ण पाण्डे, मणि खनाल र स्याम्प्लर अमर थापा रहेका थिए । 

शुक्रवार अपराह्न हेटौँडा उपमहानगरपालिकाको दलदलमा भासिएको एक गाडी अझै पनि भेटिएको छैन । घटना घटेको ५ दिन बित्दासमेत शुक्रवार अपराह्न हेटौँडा उपमहानगरपालिका वडा नम्बर १६ र १७ को सिमाना नजिकैको गैरीगाउँमा सडकबाट फसेको गाडी नभेटिएको हो ।

ना ४ च ४८३३ नम्बरको माछा बोक्ने बलेरो भ्यान क्षणभरमै सडक भासिएर त्यसभित्र छिरेको थियो । गाडी चालक हरेराम राईका अनुसार सडकमा गुडिरहेको गाडी भूकम्प आएजस्तो एक्कासी हल्लिन सुरु गरेको थियो । त्यसपछि गाडी रोकेर झ्यालबाट पछाडि हेर्दा सडक तल धसिएको देखिएपछि उनी गाडीबाट निस्किएका थिए । त्यसको क्षणभरमै गाडी पूर्ण रूपमा जमिनमुनि हराएको हो ।

गाडी गायब भएसँगै स्थानीय मात्रै नभएर सुरक्षाकर्मी र जनप्रतिनिधिको टिमसमेत त्यहाँ पुगेर विभिन्न विधि अपनाएर गाडी खोज्ने काम गरेका थिए । तर पनि कहीँ कतै गाडी भेटिएको छैन । सडक भासिएपछि गाडी भासिएको स्थानमा अहिले ठुलो दह बनेको छ ।

माछा पालिएको पोखरीको छेउमा रहेको कच्ची सडकको हिलोमा फसेको ना ४ च ४८३३ नम्बरको डीआई गाडी निकाल्ने क्रममा झन्झन् भित्र पसेर गायब भएको थियो । घटना हुनुभन्दा केही अघिसम्म सामान्य रहेको ठाउँ एक्कासि कसरी भासियो भन्नेमा स्थानीय चकित छन् ।

सो ठाउँमा पहिले बोरिङका लागि खाल्डो खनिए पनि पानी ननिस्काएपछि सानो खाल्डो यसै छोडिएको थियो । त्यही सानो खाल्डोले ठुलो घटना बनाएको स्थानीय बताउँछन् । त्यस्तै सो ठाउँमा यसअघि पनि पटक पटक घटना घट्ने गरेको स्थानीय बताउँछन् ।

गाडी खोज्न बाँस तथा रडको सहायता लिँदासमेत गाडीको अत्तोपत्तो नभएपछि हराएको गाडीको विषयमा अध्ययन गर्न हेटौँडा उपमहानगरपालिकाले भूगर्भविद् बोलाएको थियो । उपमहानगरको बोलाएपछि भूगर्भको टोली घटनास्थल पुगेको थियो ।