साधारणसभामा भाग लिन पुगेका एन्फा पूर्वअध्यक्ष गणेश थापालाई प्रवेशमा रोक, गेटमै सुरु गरे धर्ना

काठमाडौं । अखिल नेपाल फुटबल संघ (एन्फा)ले पूर्वअध्यक्ष गणेश थापालाई साधारण सभामा प्रवेशमा रोक लगाएको छ । फिफाको १० बर्षे प्रतिबन्ध फुकुवा भएपछि पहिलोपटक एन्फाको साधारणसभामा भाग लिन पुगेका उनलाई प्रवेश नदिइएपछि उनले बाहिरै धर्ना दिएका छन् । 

Watch On

काभ्रेको धुलिखेलमा सुरू भएको एन्फाको साधारणसभामा सहभागी हुन उनी शुक्रबार बिहानै कार्यक्रमस्थल पुगेका थिए । उनी पुग्दा अधिकांश एन्फाका पदाधिकारी कार्यक्रमस्थल पुगिसकेका थिए । गेटमा पुगेर भित्र प्रवेश गर्न खोजेका थापासँग पास खोजिएको थियो ।त्यस्तै पास नभएका व्यक्तिलाई प्रवेशमा रोक लगाइएको भन्दै रोकिएपछि उनी आक्रोशित बनेका छन् । उनले महासचिवलाई ज्ञापनपत्र बुझाएर धर्नामा बसेको उनका छोरा अभिषेक थापाले बताए । 

‘अदालतको आदेशपछि नै सभामा उपस्थित हुन कार्यक्रमस्थल पुग्नुभएको हो । तर पास खोज्दै प्रवेश नदिएपछि बाहिरै धर्ना दिएका छौँ ।’, उनले भने । 

आफ्ना समर्थकसहित धुलिखेलको साधारणसभामा भाग लिन पुगेका उनले बाहिर नाराबाजी गर्दै धर्ना बसेपछि भित्र भने साधारणसभा सुरु भएको छ । 

थापा फिफाको १० बर्षे प्रतिबन्ध फुकुवा भएसँगै एन्फाको साधारणसभामा सहभागी हुन पुगेका थिए । फिफाले थापालाई १६ अप्रिल २०१५ देखि प्रतिबन्ध लगाएपछि निष्कृय बनेका उनी १५ अप्रिल २०२५ मा प्रतिबन्ध फुकुवा भएपछि सक्रिय बनेका थिए । 

प्रतिबन्ध फुकुवा भएपनि एन्फाले साधारण सभामा रोक लगाउने संकेत रहेको भन्दै उनले आफू साधारण सभामा भाग लिन पाउनुपर्ने मागसहित उच्च अदालत पाटनमा रिट दिएका थिए । सो रिटउपर न्यायाधीश सुदर्शनदेव भट्टको इजलासले थापालाई साधारण सभाबाट बञ्चित नगर्न भएनै थापाकै पक्षमा फैसला गरेको थियो ।