भारत सरकारले लगायो चर्चित अनलाइन ‘द वायर’माथि प्रतिबन्ध

काठमाडौँ । भारत सरकारले ‘द वायर’ नामक चर्चित समाचार संस्थालाई भारतभर प्रतिबन्ध लगाएको छ। सरकारको निर्देशनमा भारतका इन्टरनेट सेवा प्रदायकहरूले  ‘द वायर’लाई प्रतिबन्ध लगाएका हुन् । 

Watch On

भारतमा स्वतन्त्र पत्रकारिताका लागि चर्चित मानिएको ‘द वायर’लाई भारतको सञ्चार मन्त्रालयको आदेशअनुसार सूचना प्रविधि ऐन, २००० अन्तर्गत बन्द गरिएको जनाइएको छ।

यस कदमलाई ‘द वायर’ले प्रेस स्वतन्त्रताको उल्लंघन र सञ्चारमाध्यममाथिको हस्तक्षेप भएको छ । संस्थाले जारी गरेको वक्तव्यमा भनिएको छ, “सत्य, निष्पक्ष र विवेकपूर्ण आवाजहरू र समाचारका स्रोतहरू भारतको सबैभन्दा ठूलो सम्पत्ति हुन्, र यिनै आवाजहरूलाई दबाउने प्रयास गरिएको छ।”

‘द वायर’ले यो निर्णयप्रति विरोध जनाउँदै कानुनी प्रक्रिया अघि बढाउने जनाएको छ । संस्थाले थप भनेको छ, “हामी यो मनमानी र अस्पष्ट निर्णयविरुद्ध सबै आवश्यक कदम चाल्दैछौँ।”

पछिल्ला १० वर्षदेखि जनसमर्थनको भरमा पत्रकारिता गर्दै आएको ‘द वायर’ले पाठकहरूप्रति आभार व्यक्त गर्दै भनेको छ, “हामी सत्य र तथ्यमा आधारित समाचार दिने प्रतिबद्धता बोकेर अगाडि बढ्नेछौं।”

‘द वायर’ सन् २०१५ मा स्थापना भएको एक स्वतन्त्र डिजिटल समाचार संस्था हो, जसले भारतीय राजनीति, समाज, मानवअधिकार, र सरकारको कार्यशैलीमा निगरानी गर्ने खबरहरू प्रकाशित गर्दै आएको छ। अन्य मुलधार मानिने सञ्चारमाध्यमहरूले उठाउन नसकेका विषयहरूलाई सार्वजनिक गर्ने यसको शैलीले यसले बारम्बार विवाद र सरकारी आलोचनाको सामना गर्दै आएको छ विगतमा पनि ‘द वायर’ले विभिन्न सरकारी संस्थाहरूविरुद्ध खोजी रिपोर्टहरू प्रकाशित गरेपछि कानुनी मुद्दा र दबाब झेल्दै आएको इतिहास छ। पछिल्लो प्रतिबन्धलाई पनि आलोचकहरूले सरकारद्वारा स्वतन्त्र पत्रकारितामाथिको दमनको निरन्तर प्रयासका रूपमा लिएका छन्।