नाम र दाम कमाउन मन भए सिनेमा क्षेत्रमा नआउनुसः दीपक राज गिरी

काठमाडौँ । कलाकार दीपक राज गिरीले कलाकारिता क्षेत्रमा सफल हुन अत्यन्त्र कठिन भएको बताएका छन् । आइतबार डिजिटल मिडिया अलायन्स नेपाल ‘डिम्यान’ले आयोजना गरेको प्यानल डिस्कशनमा बोल्दै कलाकार गिरीले कलाकारिता क्षेत्र भोकै बस्न र सडकमै सुत्न सक्नेले मात्र आउनुपर्ने बताएका हुन् । 

पछिल्लो समय थुपै्र व्यक्तिहरु नाम र दाम कमाउन कलाकारिता क्षेत्रमा आउने गरेको देखेको र कलाकारिता क्षेत्रमा ती कुराहरु मुश्किल भएको बताउँदै उनले उक्त क्षेत्रमा ५ प्रतिशत मानिस मात्रै सफल भएको बताए । ‘कोही मानिस कलाकार बन्न चाहान्छ । पछिल्ला दिनमा मैले के भन्न थालेको छु भने यदि तिमी पैसा कमाउन चाहान्छौ भने यो क्षेत्रमा आउँदै नआउ ।’, कलाकार गिरीले भने, ‘पैसा कमाउने तिम्रो लक्ष्य छ भने यो क्षेत्रमा तिमी आउँदै नआउ किनकि यो क्षेत्रमा ५ प्रतिशत मान्छेमात्रै सफल भएका छन् । नाम कमाउन चाहान्छौ भने पनि आउँदै नआउ । तिमी एक्टिङ गर्न चाहान्छौ र सडकमा पनि सुत्न सक्छौ भने वेलकम । भोकै बस्न चाहान्छौँ ?–आउ । त्यसपछि मात्रै सफल पनि हुन सकिन्छ, पैसा पनि कमाउन सकिन्छ, नाम पनि कमाउन सकिन्छ ।’

त्यस्तै उनले आफूले बुझेको क्षेत्रमा मात्रै लगानी गर्न समेत अनुरोध गरेका छन् । नेपालजस्तो देश जहाँ धेरै कुराको अस्थिरता रहेको बताउँदै उनले नबुझी गरेको लगानी जोखिमपूर्ण हुने बताए । उनले भने, ‘
हुन त आफू जुन क्षेत्रमा छ, त्यसमै विज्ञता हासिल गर्नु, त्यसमै बढी फोकस हुनु र त्यहीसँग सम्बन्धित क्षेत्रमा लगानी गर्नु सबैभन्दा राम्रो कुरा हो जस्तो लाग्छ । त्यो भए त्यसमा अनुभव, ज्ञान हुन्छ । तर नेपालको सन्दर्भमा अलिक फरक छ जस्तो लाग्छ । भौगोलिक अवस्थामा पनि भर पर्छ कि तिमी कहाँ छौँ, कहाँबाट है, तिमी कुन उद्योगमा छौ । जस्तो म चाहीँ सिनेमाकर्मीबाट मेरो करिअर सुरु गरेँ । त्यसपछि मैले मेरा लागि राम्रो बिज्नेस के हुन सक्ला भनेर हेर्दा हल हुन सक्छ । किनकि त्यो त्यस्तै त्यस्तै बिजनेस हो । आफूले नजानेको वा आफूले प्रशस्त ज्ञान हासिल नगरेको र कुन लेभलसम्म मैले लगानी गर्नुपर्छ, त्यसको प्रतिफल कस्तो हुन्छ, त्यसका चुनौतीहरु कस्ता हुन् भन्ने कुराको प्रशस्त ज्ञान नभइकन गरेर विभिन्न क्षेत्रमा गरिएको लगानी जोखिमपूर्ण लगानी हुन सक्छ । विशेषगरी हाम्रोजस्तो देशमा, जहाँ धेरै कुराको अस्थिरता छ ।’