जडीबुटीदेखि पेप्सीकोला चोकसम्मका सडक दायाँबायाँ संरचना हटाउन महानगरको ३५ दिने अल्टिमेटम

काठमाडौँ । काठमाडौँको जडीबुटी चोकदेखि पेप्सीकोला चोकसम्मको सडक सीमा क्षेत्रभित्र रहेका अवैध संरचना हटाउने प्रक्रिया सुरु भएको छ। काठमाडौँ महानगरपालिका र सडक विभागले सोमबार संयुक्त सूचना जारी गर्दै उक्त क्षेत्रका अनधिकृत संरचना हटाउन ३५ दिनको अल्टिमेटम दिएका छन्।

सूचनाका अनुसार अरनिको राजमार्गअन्तर्गत पर्ने जडीबुटी चोकदेखि पेप्सीकोला चोकसम्म सडकको केन्द्र रेखाबाट दायाँबायाँ १५–१५ मिटर क्षेत्र सडक सीमाका रूपमा कायम गरिएको छ। सो क्षेत्रमा वैशाख १० गते नेपाल सरकार र स्थानीय तहका निकायहरूको संयुक्त टोलीले सीमाङ्कन गरी चिनो लगाएका थिए । 'सडक सीमा क्षेत्रभित्र नक्सा पास विपरीत निर्माण गरिएका पक्की–कच्ची संरचना, बार, गेट, पर्खाल, सटर, टहरा लगायत सम्पूर्ण अनधिकृत संरचना ३५ दिनभित्र आफैं हटाउन सूचित गरिन्छ', सूचनामा उल्लेख छ।

त्यस्तै सार्वजनिक सम्पत्तिको अनधिकृत अतिक्रमण नगर्न स्थानीय निकायले पटकपटक अनुरोध गर्दै आएको छ। अनधिकृत रुपमा बनाइएका संरचना तोकिएको समयसीमाभित्र संरचना नहटाएमा सार्वजनिक सडक ऐन, २०३१, स्थानीय सरकार सञ्चालन ऐन, २०७४ तथा प्रचलित भवन निर्माण मापदण्डअनुसार कारबाही अघि बढाइने काठमाडौं महानगर र सडक विभागले चेतावनी दिएको छ।

सरकारी निकायहरूले स्वेच्छिक रूपमा संरचना हटाउन अपिल गर्दै आगामी चरणमा डोजर चलाउने तयारीसमेत गरिरहेको जनाइएको छ।