कारागारमा भएका रविसँग मिटरब्याज पीडितको गुनासो, ‘अन्याय भयो भनेर कहाँ जाने ? हाम्रा लागि सिंहदरबारको ढोका बन्द छ’

काठमाडौँ । मिटर ब्याज पीडित किसान मजदुरहरूले कारागारमा रहेका राष्ट्रिय स्वतन्त्र पार्टीका सभापति रवि लामिछानेसँग भेट गरेका छन् । मिटर ब्याज तथा ठगी विरुद्ध किसान मजदुर सङ्घर्ष समितिका संयोजक अवधेश कुशवाह र निर्घ नविनसहितको टोलीले भैरहवास्थित रुपन्देही जिल्ला कारागारमा भेट गरेका हुन् ।

Watch On

भेटमा उनीहरूले किसानका समस्यामा सरकार अनुदार बनेको गुनासो गरेका छन् । गृहमन्त्रीका रूपमा रवि लामिछानेले गरेका सम्झौता नयाँ सरकार बनेपछि कार्यान्वयन नगरिएको उनीहरूको गुनासो छ । 
सरकारले मिटर ब्याज पीडितलाई चिन्न छोडेको बताउँदै निर्घ नवसिनले भने, ‘पहिला जुन तदारुकताका साथ काम भएको थियो, अहिले त्यो छैन । त्यति लामो छलफल र गृहकार्यपछि भएको सम्झौता अहिले कार्यान्वयन हुनै सक्दैन भन्ने कुरा भइराखेको छ । एक हिसाबले भन्ने हो भने सरकारले हामीलाई चिन्न छोडिसक्यो ।’

त्यस्तै सङ्घर्ष समितिका संयोजक अवधेश कुशवालले अन्याय भयो भनेर जाने गृह मन्त्रालयको ढोका आफूहरूका लागि बन्द भएको गुनासो गरे । उनले भने, ‘जिल्लाहरूमा प्रहरी र सिडिओहरू फेरिए । अहिले हाम्रै साथीहरूमाथि मुद्दा चलाइएको छ, पक्राउ गरिएको छ । सरकार साहुकारहरू जोगाउन लागिराखेको छ । अन्याय भयो भनेर कहाँ जाने ? गृह मन्त्रालयको ढोका बन्द जस्तै छ अहिले पीडितका लागि ।’
उनीहरूको गुनासोपश्चात् रवि लामिछानेले नआत्तिन र एक भएर अघि बढ्न आग्रह गरे । पीडितहरूमाथि राजनीति हुन नहुने भन्दै उनले न्यायको लडाइँ एक दिन अवश्य जितिने बताए । लामिछानेले भने, ‘धनी र गरिबबिचको लडाइँ लामो चल्छ । जित न्यायको हुन्छ तर धैर्य गर्नु, जनताको कुरा सरकारले नसुनेर कहाँ हुन्छ ? सुन्नुपर्छ, सुन्छ । यो नभए अर्कोले सुन्छ । त्यतिन्जेल तपाईँहरूबिच फाटो आउन भएन । एक भएर लड्नुपर्छ । मलाइ हेर्नुस् त मेरो स्वार्थ के छ ?  जनताकै लागि लड्दा यो दुःख पाएको छु । न्याय पाउनुअघि दुःख हुने रहेछ । यसपछि न्याय हुन्छ । तपाईँहरूले पाएको दुःख न्याय पाउनुअघिको हो । नआत्तिनु ।’