समाज

४६ दिनदेखि हिरासतमा रहेका रवीन्द्र मिश्र रिहाइको माग गर्दै सर्वोच्चमा रिट

सिधाकुरा

मंगलबार, वैशाख ३०, २०८२

४६ दिनदेखि हिरासतमा रहेका रवीन्द्र मिश्र रिहाइको माग गर्दै सर्वोच्चमा रिट

काठमाडौँ । ४६ दिनदेखि प्रहरी हिरासतमा रहेका राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्रको रिहाइको माग गर्दै सर्वोच्च अदालतमा रिट दायर भएको छ । तीनकुनेमा भएको हिंसात्मक प्रदर्शनमा संलग्न भएको आरोपमा चैत १५ गते पक्राउ परेका मिश्रको रिहाईको माग गर्दै मंगलबार सर्वोच्चमा रिट दायर भएको हो ।

अदालतमा उनकी श्रीमती सारिका कार्कीले रिट दायर गरेकी हुन् । मिश्रको बयान सकिएपनि उनलाई विभिन्न मुद्दा थप गरेर थुनाउन खोजेको भन्दै कार्कीले रिट दायर गरेकी हुन् । रिटमा गृह मन्त्रालयलाई विपक्षी बनाइएको छ।
मिश्रमाथि प्रहरी राज्यविरुद्धको अपराध, संगठित अपराध र आपराधिक उपद्रव सम्बन्धी अभियोगमा काठमाडाैँ प्रहरी परिसरले अनुसन्धान गरिरहेको छ।

चैत १५ गते तीनकुनेमा संयुक्त जनआन्दोलन समिति र दुर्गा प्रसाईंको आह्वानमा राजावादीहरुले प्रदर्शन गरेका थिए । उक्त प्रदर्शन प्रदर्शमा मात्र सिमित नभएर तीनकुने, कोटेश्वर, जडिबुटि र बालकुमारी क्षेत्र रणमैदानमा परिणत भएको थियो । सो क्रममा थुप्रै सार्वजनिक र व्यक्तिगत सम्पत्ति तोडफोड हुनुका साथै २ जनाको ज्यान समेत गएको थियो ।

प्रकाशित मिति: मंगलबार, वैशाख ३०, २०८२

प्रतिक्रिया दिनुहोस्