काठमाडौँ । प्रधानमन्त्री केपी शर्मा ओलीले नेपाल राष्ट्र बैकको रिक्त गभर्नरमा योग्यताक्रमका आधारमा क्षमतावान व्यक्तिको नियुक्ति गर्ने पक्षमा आफू रहेको बताएका छन् । 

बिहीबार काठमाडौँमा पूर्व योजनाकार मञ्च नेपालको औपचारिक शुभारम्भ गर्दै प्रधानमन्त्री ओलीले गभर्नरमा व्यक्तिगत निकटताका आधारमा नभई योग्यताक्रमका आधारमा क्षमतावान व्यक्तिको नियुक्ति गर्ने पक्षमा आफू रहेको बताएका हुन् । काम गर्न सक्ने मान्छे भए देशलाई राम्रो हुने भन्दै उनले व्यक्तिगत रुपमा आफ्नो मान्छेलाई गभर्नर बनाउने कुनै इच्छा नभएको जिकिर गरे । ‘राष्ट्र बैंकको गभर्नरमा मेरो उम्मेदवार कोही पनि छैन । त्यहाँ आफ्नो भन्ने केही पनि छैन । ‘कम्पिटेटिभ’ खालको मान्छे र अविवादित मान्छे ल्याउँ भन्ने मेरो आग्रह हो ।’ प्रधानमन्त्री ओलीले भने ।

उनले अहिले आफु प्रधानमन्त्री भएपनि सरकारमा आफुमात्रै नरहेको बताए । प्रधानमन्त्री ओलीले संक्रमणकालीन न्यायसँग सम्बन्धी आयोगमा पनि क्षमता भएका व्यक्ति नियुक्ति गरिएको धारणा राखे । एक आयोगका अध्यक्षलाई मुख्यसचिव हुँदा चिनेको बाहेक अरु पदाधिकारीसँग आफ्नो व्यक्तिगत चिनजान र सम्बन्ध नरहेको उनको भनाई छ ।

उनले पूर्व योजनाकारहरुको संस्थाबाट आफ्ना सोच र अनुभवको आदानप्रदान हुने विश्वास व्यक्त गर्दै व्यक्तित्व टकराव नगरी संस्थाको दिगोपनामा ध्यान दिन आग्रह गरे ।