रवि लामिछाने पक्षलाई थाहै नदिई उच्च अदालत पोखरामा सूर्यदर्शन सहकारी सम्बद्ध मुद्दाको सुनुवाई

काठमाडौँ । राष्ट्रिय स्वतन्त्र पार्टीका सभापति रवि लामिछानेविरुद्धको सूर्यदर्शन सहकारी सम्बद्ध मुद्दामा लामिछाने लगायत प्रतिवादी पक्षलाई पेसीको सूचना नै नदिई सुनुवाई गरिएको छ । कास्की जिल्ला अदालतले धरौटीमा छोड्न दिएको आदेशविरुद्ध रवि लामिछाने दिएको ७३ नम्बरको निवेदनको सुनुवाई हुने गरि आज उच्च अदालत पोखरामा पेशी तोकिएको थियो । तर, प्रतिवादी रवि लामिछानेसहितलाई पेशीको सूचना नै नदिएको उनका कानुन व्यवसायीहरुले बताएका छन् । 

उक्त मुद्दा उच्च अदालत पोखराका मुख्य न्यायाधीश रत्नबहादुर बागचन्द र न्यायाधीश मिलनकुमार राईको इजलासमा परेको थियो । अन्य स्रोतबाट पेशी चढेको जानकारी पाएपछि रवि लामिछाने तथा छविलाल जोशी र रामबहादुर खनालले पेशीको जानकारी प्राप्त नभएको र  त्यही कारण तयारी नगरिएको भन्दै पेशी स्थगित गर्न निवेदन दिएको रवि लामिछानेको मुद्दा हेरेका बरिष्ठ अधिवक्ता रोहित बास्तोलाले जनाकारी दिए । 

पेशी स्थगित गर्नका निवेदन दिएपनि निवेदन स्वीकार नगरी सुनुवाइ अघि बढाइएको छ । ‘न्यायाीक परिपाटी र प्रचलनमा हिरासतमा वा कारगारमा रहेको पक्षलाई उसको मुद्दाको सुनुवाई हुँदैछ भनेर फलानो दिनमा पेसी चढेको छ भनेर सूचित गरिन्छ । सूचना पुगेको रहेनछ भने सूचना दिएर पुनः पेस गर्ने भनेर आदेश हुने परम्परा छ ।’ बरिष्ठ अधिवक्ता बास्तोलाले भने, ‘तर सूचना आएन । हाम्रो पालो आएको छैन । तपाईँहरुको पालो आएपछि भन्नुहोला भनिएको छ ।’ 

उच्च अदालत पोखराका उप–रजिष्ट्रार तथा सूचना अधिकारी निल प्रसाद पनेरुले भने इजलासमा सुनुवाई सुरु भईसकेको विषयमा आफूले बोल्न उपयुक्त नहुने बताए । उनले आज वादी पक्षबाट बहस भएको जानकारी पाएको र मुद्दा हेर्दाहेदैमा गएको बताए । 

उक्त मुद्दामा आज सुनुवाई हेर्दाहेर्दैमा राखिएको छ । भोलि सोही इजलासमा उक्त मुद्दाको सुनुवाई हुनेछ ।