‘म्यान अफ द वर्ल्ड’का नेपाली प्रतिनिधि आयुष दुलाललाई प्रहरी महानिरीक्षकले गरे बिदाइ

काठमाडौं । ‘म्यान अफ द वर्ल्ड २०२५’ अन्तर्राष्ट्रिय प्रतियोगितामा नेपालको प्रतिनिधित्व गर्न लागेका आयुष दुलाललाई नेपाल प्रहरीका महानिरीक्षक (आईजीपी) दिपक थापाले आइतबार बिदाइ गरेका छन्।

प्रहरी प्रधान कार्यालय नक्सालमा आयोजित विशेष कार्यक्रममा आईजीपी थापाले दुलाललाई दोसल्ला ओढाइ सम्मान गर्दै शुभकामना पत्र प्रदान गरेका हुन्। थापाले प्रतियोगितामा उत्कृष्ट प्रदर्शन गर्दै नेपाललाई अन्तर्राष्ट्रिय मञ्चमा चिनाउन सफल हुने महानिरीक्षक थापाले विश्वास व्यक्त गरे । 

काभ्रेपलाञ्चोकको बनेपा नगरपालिका वडा नं. १४ निवासी दुलालले आगामी मे २३ देखि ३१ सम्म फिलिपिन्समा आयोजना हुने ‘म्यान अफ द वर्ल्ड २०२५’मा नेपालको प्रतिनिधित्व गर्ने छन्।

दुलालले ‘मिस्टर नेपाल २०२४’ प्रतियोगितामा सहभागी भई ‘म्यान अफ द वर्ल्ड नेपाल २०२५’ तथा ‘बेस्ट पर्सनालिटी’ को उपाधि जितेका थिए।

आईटी स्नातक र मानसिक स्वास्थ्य प्राथमिक सहयोगी समेत रहेका युवा मोडल तथा सामाजिक अभियन्ता दुलालले मानसिक स्वास्थ्यप्रति जनचेतना अभिवृद्धि तथा खेलकुद प्रवर्धनमा सक्रिय भूमिका खेल्दै आएका छन्।

नेपालका लोकप्रिय फुटबल खेलाडीसमेत रहेका उनले अष्ट्रेलियाबाट व्यवसायिक फुटबल खेलिसकेका छन्।

उनले ‘म्यान अफ द वर्ल्ड’ प्रतियोगिता केवल फेसन वा लुक्सको प्रतिस्पर्धा नभई शिक्षा, सामाजिक नेतृत्व र सकारात्मक पुरुष छवि निर्माणको अभियान भएको उल्लेख गर्दै नेपालले यसपटक उपाधि जित्ने सम्भावना उच्च रहेको बताएका छन्।