बालेनले नटेरेपछि प्रधानमन्त्रीको आक्रोश, भन्छन् – हाई लेभल कमिटीमा नआउने हो भने अर्को पटकदेखि नबोलाउनु

काठमाडौँ । प्रधानमन्त्री केपी शर्मा ओलीले सरकारले आयोजना गरेको कार्यक्रममा महानगरपालिकाका मेयर बालेन शाह नआएको भन्दै आक्रोश व्यक्त गरेका छन् । सोमबार सिंहदरबारमा बसेको गणतन्त्र दिवस मूल समारोह समितिको बैठकमा महानगरपालिकाका मेयर नआएको भन्दै प्रधानमन्त्रीले आगामी कार्यक्रममा नआउने हो भने नबोलाउन निर्देशन दिएका छन् । 

बालेनको नाम नतोकि उनले सरकारले आयोजना गरेका हाई लेभल कमिटिका कार्यक्रमहरुमा सधैं नाम राखिरहनुपर्ने तर आउनुपर्नेले नआइदिएपछि अर्को पटकबाट नबोलाउन निर्देशन दिएका हुन् । 

यस्तो छ प्रधानमन्त्रीले बालेनप्रति इंगित गरेर दिएको अभिव्यक्तिको सम्पादित अंशः
कहिले पनि नआउने, नाम राखिरहनुपर्ने। मानका खातिर मानको चलन चाहिँ छोड्दा पनि हुन्छ कि क्यो हो !  कोही कोही मान्छे सँगै राख्ने गछौँ हामीले, हरेक फंग्सन । तर कहिल्यै देखा पर्दैन। केही गर्दैन, त्यस्तो खालको मान्छे खोज्यो भने भेटिन्छन् कि जस्तो लाग्छ मलाई। 
कहिले पनि नआउने, नाम सधैं टाँस्नुपर्ने पदोदयका कारणले । कुनै व्यक्तिलाई कुनै अर्थ छैन, महत्व नै छैन, वास्तै छैन भने सधैं नाम झुन्ड्याइरहने, त्यो नगरे पनि हुन्छ क्या।
जो मान्छे, कि तपाईँहरु सोध्नुस् आउने हो की हैन । रुची छ कि छैन ? हाई लेभल कमिटिमा सहभागिताका लागि आमन्त्रण गर्ने, तर एकपल्टको कुरा हैन, दुईपल्टको कुरा हैन, तीनपल्ट हैन । ३ पटक निरन्तर आएन भने त पदै जान्छ । त्यस्तो ठाउँमा ४÷५ पटक जसलाई नआउने । न चाड, न पर्व, न केही, कुनै वास्ता नभएको, त्यस्तोमा सँधै बोलाउनुपर्ने । हामीलाई त्यो बाध्यता हुने अनि आउनुपर्ने मान्छेलाई बोलाराख्नुपर्ने । यस्तो हुँदैन। अर्को पल्टसम्ममा सोधीखोजी गर्नुहोला। हेर्नुहोला रेकर्ड कोको एक पटक पनि आउँदैन। त्यो रेकर्ड हेरेर आउने हो कि होइन सोधेर आउने होइन, आउन सकिन्न भने नाम नराख्नु। हरेक पटक इतिहास चाहिँ बनिरहने, नाम छापिरहनुपर्ने, मान्छे नआउने।

मूल समारोह समितिमा उपप्रधानमन्त्री, मन्त्री, राज्यमन्त्रीहरू, काठमाडौँ महानगरपालिकामा प्रमुख, नेपाल सरकारका मुख्यसचिव, प्रधानसेनापति, ललितपुर महानगरपालिकाका प्रमुख, नेपाल सरकारका विशिष्ट श्रेणीका राजपत्राङ्कित अधिकृतहरू, नेपाल प्रहरीका महानिरीक्षक, सशस्त्र प्रहरीका महानिरीक्षक, राष्ट्रिय अनुसन्धान विभागका मुख्य अनुसन्धान निर्देशक, काठमाडौँ उपत्यकाका नगरपालिकाका प्रमुखहरू सदस्य र गृह मन्त्रालयका सचिव सदस्यसचिव रहनेछन् । 
अन्य सबैजना बैठकमा उपस्थित हुँदा महानगरका मेयर बालेन भने उपस्थित भएका थिएनन् ।