काठमाडौँ महानगरद्वारा आज ‘सिप मेला २०८२’ अभिमुखीकरण कार्यक्रम, एसएमएस नपुगेका छनोट प्रशिक्षार्थीलाई टुँडिखेलमै जानकारी लिन आग्रह

काठमाडौं– काठमाडौं महानगरपालिकाले सिप मेलाको दोस्रो सस्करण ‘सिप मेला २०८२’ आज ४ बजेबाट सुरु गर्ने भएको छ । काठमाडौँ महानगरपालिकाले आज अपरान्ह ०४ः०० बजे टुँडिखेलमा ‘सिप मेला २०८२’ का आवेदकमध्ये छनोट भएका प्रशिक्षार्थीहरुका लागि ‘अभिमुखीकरण कार्यक्रम’ आयोजना गर्दैछ । 

Watch On

कार्यक्रममा सहभागी हुन हिजो नै एसएमएस पठाइसकिएको छ । एसएमएस पठाएका कति प्रशिक्षार्थीहरुले प्राविधिक कारण सन्देश प्राप्त नगरेको हुन सक्ने देखिएकोले प्रशिक्षार्थीहरुलाई अभिमुखीकरण कार्यक्रम स्थल आएर जानकारी लिनुहुन महानगरपालिकाका प्रमुख बालेन्द्र शाहले अनुरोध गरेका छन् । 

तालिममा सहभागी हुन इच्छा भएका तर अहिलेसम्म फाराम भर्न छुट्नु भएका महानुभावहरुलाई तालिम स्थलमा आएर अनलाइन क्युआर कोडमार्फत आवेदन दिन सक्ने व्यवस्था मिलाइएको समेत अनुरोध गरेको छ । 

आजदेखि काठमाडौँको टुँडिखेलमा सञ्चालन हुने मेलामा १० क्षेत्रका ३४ सँग सम्बन्धित विषयमा तालिम सञ्चालन हुने सिप मेला कार्यान्वयन समितिका संयोजक इञ्जिनियर शैलेन्द्र झाले जानकारी दिए ।

सरकारी निकाय, गैरसरकारी संघसंस्था, निजी क्षेत्र तथा दातृ निकायसँग सहकार्य गरेर तालिम निःशुल्क प्रदान गरिनेछ । यस वर्ष २०८२ जनालाई निःशुल्क तालिम दिने लक्ष्य राखिएको छ । काठमाडौँ महानगरपालिकाभित्र स्थायी वा अस्थायी रूपमा बसोबास गर्ने, ल्याण्डफिल साइट प्रभावित क्षेत्रका बासिन्दा, फरक क्षमता भएका व्यक्ति र यसअघि सडक पेटीमा व्यापार व्यवसाय गरिरहेका व्यक्तिहरुलाई तालिमको प्राथमिकतामा राखिनेछ । 

१८ वर्षदेखि ५८ वर्ष उमेर समूहका नेपाली नागरिकलाई तालिममा सहभागी गराइनेछ । 

तालिमका क्षेत्र र विधा
१० वटा क्षेत्रका ४० भन्दा धेरै विधामा प्रदान गरिने तालिमको सञ्चालन अवधि ३० दिनको हुनेछ । दैनिक ६ वटा कक्षा सञ्चालन गरेर १ सय घण्टा तालिम दिइनेछ । 
तालिमका लागि बुधबार सम्म करिव ११ हजारले अनलाइन फाराम भरेका छन् । अनलाइन फाराम भर्न नजान्नेलाई कार्यक्रम स्थलमा नै फाराम भर्ने व्यवस्था मिलाइएको महानगरपालिकाले जनाएको छ ।