एन्ड्र्यू उशाकोभको कीर्तिमान : ३ दिन २३ घण्टामा अमेरिकाबाट सगरमाथाको शिखरसम्म

काठमाडौं ।  युक्रेन मूलका अमेरिकी नागरिक एन्ड्र्यू उशाकोभले सगरमाथा आरोहणको इतिहासमा नयाँ कीर्तिमान राखेका छन्। उनले समुद्री सतह अर्थात् न्यूयोर्कबाट सिधै ८,८४८ मिटर अग्लो सगरमाथाको शिखरसम्मको यात्रा मात्र ३ दिन, २३ घण्टा र ७ मिनेटमा सम्पन्न गरेकाे किर्तिमानी आरोही तथा एलिट एक्सपेडका संचालक निम्स पुर्जाले जानकारी दिए ।  उनको अभियान एलिट एक्सपेडले सञ्चालन गरेकाे थियाे ।

उनी मे १५ तारिखको बिहान १२:३० बजे न्यूयोर्कबाट आफ्नो अभियान सुरु गरी काठमाडौं हुँदै सिधै सगरमाथा आधार शिविर पुगेका थिए। त्यसपछि मे १९ को बिहान ९:२२ बजे उनले सगरमाथाको शिखरमा पाइला टेकेका थिए।

सामान्यतया सगरमाथा चढ्न करिब ५० दिन लाग्ने गर्दछ, किनभने पर्वतारोहीहरूले उच्च उचाइमा शरीरलाई अनुकूल बनाउन 'एक्लिमेटाइजेसन'को प्रक्रिया अपनाउनुपर्छ। तर उशाकोभले विशेष तयारीका रूपमा ४०० घण्टाभन्दा बढी समय एक हाइपोक्सिक टेन्टमा बिताएका थिए, जसले उच्च उचाइको अवस्था अनुकरण गर्छ।

पुर्जाका अनुसार एन्ड्र्यू पेशेवर पर्वतारोही होइनन्। उनले २०२० मा पर्वतारोहण सुरु गरेका थिए। उनी व्यवसायी हुन् र एक सन्तानका पिता पनि हुन्। हालै मात्र उनी हिमपहिरोमा परी काँध भाँचिएर निको भएका थिए।

उनको अभियानमा  Elite Exped का गाइड र शेर्पाहरू — तेजन गुरुङ (टीजे), पुरबहादुर गुरुङ, विधान श्रेष्ठ, सुजल गुरुङ, कीटेम्बा शेर्पा र पेम्बा छेवाङ शेर्पा — को महत्त्वपूर्ण भूमिका थियो। आधार शिविरदेखि शिखरसम्मको यात्रामा उनले बोतल अक्सिजनको प्रयोग गरेका थिए।

एन्ड्र्यू र उनको टोलीले झर्ने क्रममा हिमालबाट फोहोर सङ्कलन गर्दै वातावरणीय संरक्षणमा पनि योगदान दिएका छन्।

“यो केवल हिमाल चढाइको कुरा होइन, यो आफैंलाई चुनौती दिने र आफ्नो सीमा पार गर्ने कुरा हो,” एन्ड्र्यूले आफ्नो सफलतापछि प्रतिक्रिया दिँदै भने।