निकिता पौडेलको गुनासो, ‘अदालतले न्याय त दिएन–दिएन, मानवीय व्यवहार पनि गरेन’

काठमाडौँ । राष्ट्रिय स्वतन्त्र पार्टीका सभापति रवि लामिछानेकी पत्नी निकिता पौडेल लामिछानेले आफूले सर्वोच्चमा दायर गरेको रिटको आदेश सुन्न बसेको आफूमाथि नै अदालत प्रशासनले गैरजिम्मेवारीपन देखाएको बताएकी छिन् । सोमबार फेसबुकमा एक स्टाटस लेख्दै उनले आफू निवेदक भएको र आदेश सुन्न अदालत कुरेर बसेको आफूमाथि अदालत प्रशासनले गैरजिम्मेवारीपन देखाएको गुनासो गरेकी छिन् । 

Watch On

पौडेलले दुई बजेतिर बहस सकिएपछि आदेशको प्रतीक्षामा ७ घण्टासम्म पनि अदालतका प्रवक्ताको कोठामा आदेश सुन्न बसेको तर अदालतले आदेश सुनाउनुपूर्व बाहिर चुहाएको भन्दै गुनासो व्यक्त गरेकी छिन् । ‘करिब दुई बजेतिर बहस सकिएपछि आदेशको प्रतीक्षामा यताउति गरिरहे। केहीपछि सह–रजिष्ट्रार (प्रवक्ता)को कार्यकक्षमा बस्न भनियो। केही सञ्चारकर्मी पनि थिए। आदेश कुर्दाकुर्दै करिब ७ घण्टा बित्यो। ‘एकैछिन है ..’ भन्दै कार्यकक्षबाट निस्किएका प्रवक्ता फर्किएनन। आदेश ल्याएर सुनाउनु पर्ने मान्छे नै हराए।’, उनले लेखेकी छिन्, ‘‘श्रीमान त निस्किनु भयो’ भनेर एकजना पत्रकार भाइले जानकारी दिए। त्यसको आधा घण्टासम्म पनि आदेश लिएर कार्यकक्ष फर्किएनन प्रवक्ता। बाहिर निस्किदा एकजना आफन्तले फोनमा ‘नेगेटिभ समाचार छ, मैले कान्तिपुरको अनलाइनमा पढें’ भन्नुभयो। म अदालतमै छु। केही घण्टादेखि आदेशबारे आधिकारिक जानकारी दिने प्रवक्ताको कार्यकक्षमै छु। म निवेदक, मेरो श्रीमानबारे आएको आदेश बाहिरबाट सुन्नुपर्ने, अदालतले आधिकारीक रुपमा नसुनाउने। अदालत प्रशासन कतिसम्म गैरजिम्मेवार। अदालतले न्याय त दिएन–दिएन, मानवीय व्यवहार पनि गरेन। मानवता हराएको देश ! झमझम पानी परिरहेको थियो, अदालतबाट निस्किएँ।’

उनले शुक्रबारको तनाब, अनिन्द्रा र रुवाई जिन्दगीकै अत्यन्तै कठिन दिन भएको बताएकी छिन् । त्यस्तै उनले अन्यायको शिकार भएर जिउँदो लास भएकी आफू श्रीमान (रवि)को अगाडि पुगेपछि मात्रै होस खुलेजस्तो भएको बताएकी छिन् । 

त्यस्तै उनले केही प्रमाण नभेटिँदा पनि श्रीमानविरुद्ध मुद्दा लगाइएको, थुनामा राखिएको र सोविरुद्ध आफूले दायर गरेको रिटमा अदालतले एक शब्द समेत नबोलेको गुनासो गरेकी छिन् । ‘केही प्रमाण नभेटिँदा पनि मेरो श्रीमानविरुद्ध मुद्दा लगाइयो। नियत नै राखेर थुनियो। गैरकानूनी पक्राउबारे परेको रिटमा अदालतले एक शब्द पनि बोलेन। अब, न्याय माग्न म कहाँ जाऊँ ? मनको डर मेटाउन कसलाई गुहारौं ?’, उनले लेखेकी छिन् । 
पौडेलले गणतान्त्रिक राज्यमा समेत न्याय र मानवीयता मृत भेटेपछि मेरो आस्था र विश्वासको जग बेस्सरी हल्लिएको बताएकी छिन् ।