काठमाडौँ । राप्रपा अध्यक्ष राजेन्द्र लिङ्देनले लाखौँ जनता सडकमा आए एकैदिनमा गणतन्त्र समाप्त हुने बताएका छन् । 

सोमबार काठमाडौँमा आयोजित युवासंग राप्रपा कार्यक्रममा लिङ्देनले भारतमा १९० बर्ष पुरानो ब्रिटिस शासन भद्र अवज्ञाको बाटोबाटै अन्त्य भएको उदाहरण दिदै दुई दशक नपुगेको गणतन्त्र लाखौं जनता सडकमा आए एकैदिनमा समाप्त हुने बताएका हुन् । भद्र अवज्ञा, सत्याग्रह र शान्तिपूर्ण आन्दोलनबाट अहिलेको व्यवस्थालाई हटाएर छाड्ने उनले बताए । 

‘यो नाथे गणतन्त्र २ दशक पुगेको छैन । शान्तिपूर्ण ढंगले नै हामी लाखौँ जनता सडकमा आयौँ भने एकैदिनमा समाप्त हुन्छ । हामीले एउटा ढुंगा हान्नु पर्दैन । त्यसकारण हामी लड्न आउँदैनौँ, व्यवस्था परिवर्तन गर्नका लागि हो र त्यो आन्दोलन अहिंसात्मक र शान्तिपूर्ण हुन्छ । र हामीले अहिंसात्मक आन्दोलनको बाटोबाटै परिवर्तन खोजेका छौँ ।’, लिङ्देनले भने । 

अध्यक्ष लिङदेनले अहिलेको व्यवस्थाप्रति जनतामा चरम असन्तुष्टि रहेको भन्दै यहि अवस्था रहे बर्षौसम्म पनि अनुभूति हुनेगरिको परिवर्तन महशस गर्न नपाउने धारणा राखे । उनले देश बिग्रिए केपी ओली, शेर बहादुर देउवा वा प्रचण्डको केहि नबिग्रने तर युवाहरु भविष्य भने बिग्रने भएकाले युवाहरु नै सचेत भएर अघि बढ्नुपर्नेमा जोड दिए । 

अध्यक्ष लिङ्दनेले अहिलेका दलबाट देश थप जटिल अवस्थामा पुग्ने भएकाले समयमा नै व्यवस्था परिवर्तन गर्नुपर्ने बताए ।